Ироқ устози: «Францияга қарши уч дарвозабон билан тушмоқчи эдик. Рухсат беришмади»

Ироқ миллий жамоаси бош мураббийи Грэм Арнолд ЖЧ-2026 2-туридан ўрин олган Францияга қарши ўйин ҳақида ҳазил қилди.

«Мен ҳар доим майдонга ютқазмаслик учун эмас, балки ғалаба қозониш учун чиқадиган мураббий бўлганман. Бундай руҳият билан баъзан ишлар ўхшамай қолиши мумкин, аммо ўхшайдиган кунлар ундан ҳам кўп бўлади.

Уч нафар дарвозабон билан ўйнаш мумкинми, деб сўрадим. Йўқ, деб жавоб беришди.

Қаранг, рақибнинг таркибида ажойиб футболчилар бор ва уларга қарши ўйнаш — биз учун шараф.

Биз майдонга ўз ўйинимизга эътибор қаратган ҳолда чиқамиз. Франциянинг қандай ўйнашини назорат қила олмаймиз, аммо ўз ўйинимизни назорат қила оламиз. Футболчилар майдонга чиқиб, ўз имкониятларини бутун дунёга намоён этишлари учун қўлимиздан келган барча ишни қиламиз», — дея 62 ёшли австралияликнинг сўзларини келтиради Reuters.