Ўзбекистон миллий жамоаси яримҳимоячиси Достон Ҳамдамов ЖЧ-2026 1-туридан ўрин олган Колумбия (1:3) билан ўйиндан сўнг ЎФА матбуот хизматининг бир қатор саволларига жавоб берди.
— Ўйиндан сўнг бош мураббий нималар деди?
— Жуда яхши ўйин кўрсатдинглар, рақибга кучли қаршилик қилдинглар деди. Бундан хурсандлигини ва ишлашда давом этишимизни, яна шундай куч билан Португалияга қаршилик кўрсатишимизни айтиб ўтди. Бундан кучли мотивация олдик. Олдинга интилишда давом этамиз.
— Энди бироз ортга қайтамиз. 2009 йили Роналду Тошкентга келганди. Ўша кун ҳақида нималарни эслайсиз?
— Эсда қоларли кун бўлган. Орадар шунча йил ўтиб, Роналдуга қарши ўйнаймиз деб ўйламагандик. Ўша пайтлари биз учун унга қарши ўйнаш орзу бўлган. Унда ёш бола бўлганмиз, Роналду эса кучга тўлган, юлдузлик пайтлари эди. Яна унга қарши ўйнаб, ўша хотираларни эслаймиз.
Унинг ўйинларини ёшлигимиздан кузатиб келамиз — жуда кучли футболчи. Бундан кейин ҳам шундай бўлиб қолади. Роналду ман учун кумир, десам ҳам бўлади.
— Энди майдонга рақиб сифатида тушиш қандай ҳис беради?
— Бу қандайдир тушга ўхшайди. Нафақат Роналду, Европанинг топ клубларида ўйнайдиган футболчиларга қарши ҳаракат қилиш қийин. Лекин иккинчи томондан ёқимли. Яхши қаршилик кўрсатамиз.
