«Манчестер Юнайтед» 100 минг томошабинга мўлжалланган янги стадион қуриш учун зарур ер майдонининг асосий қисмини сотиб олганини маълум қилди.
«Клуб янги стадион қурилиши учун керак бўлган ер майдонининг катта қисмини харид қилди. Бу Олд Траффорд туманини ўзгартиришга қаратилган узоқ муддатли стратегиядаги муҳим босқич ҳисобланади.
Буюк Британиядаги энг йирик спорт иншоотига айланиши кутилаётган янги стадион ҳудудни қайта жонлантириш учун катализатор вазифасини бажаради. Шунингдек, у дунёдаги энг замонавий кўнгилочар марказларидан бирини шакллантиришга хизмат қилади.
Клуб ҳозирги стадиондан тахминан 350 метр шимоли-ғарбда жойлашган, майдони 25 акр (101 171 кв.м) бўлган ер участкасини Indurent компаниясидан сотиб олди. Ушбу компания саноат объектлари соҳасидаги етакчи операторлардан бири бўлиб, Blackstone инвестиция портфелига киради. «Юнайтед» ушбу режалар таъсирига тушадиган корхоналар билан бевосита ишлаб, уларни ўтиш даврида қўллаб-қувватлашини билдиради.
370 акр (1 497 336 кв.м) майдонни қамраб оладиган реконструкция лойиҳаси доирасида тахминан 15 мингта янги уй-жой, жумладан, арзонлаштирилган уйлар қурилиши, маҳаллий даражада 48 мингта ва мамлакат бўйича 90 мингдан ортиқ янги иш ўрни яратилиши кутилмоқда. Шунингдек, лойиҳа Буюк Британия иқтисодиётига ҳар йили 7 миллиард фунт стерлингдан ортиқ ҳисса қўшиши прогноз қилинмоқда», — дейилади клуб баёнотида.
