АПЛ клуби мавсумни 6 очколик жарима билан бошлаши мумкин

Плей-офф финалида «Мидлсбро»ни мағлуб этиб, Премер-лига йўлланмасини қўлга киритган «Ҳалл Сити» 2026/2027 йилги мавсумни очколар бўйича минус кўрсаткич билан бошлаш хавфи остида турибди. Бунга сабаб — фойда ва молиявий барқарорлик қоидаларининг бузилиши. Клуб 1 июлга қадар тахминан 6 миллион фунт стерлинг миқдоридаги тақчилликни қоплаши шарт, акс ҳолда элита дивизионда 6 очколик жарима қўлланади.

«Йўлбарслар» клуби эгаси Aкун Илижали «Эм-Кей-Эм Стэдиум»да мухлислар билан учрашув чоғида бу муаммони тан олди.

«Биз маблағни режадан ортиқ сарфлаб юбордик ва 1 июлгача бир нечта футболчиларни сотишга мажбурмиз. Бундан қўрқмайман, биз бундан ҳам мураккаб вазиятларни енгиб ўтганмиз. Энди биз Премер-лига клубимиз, футболчиларимизнинг қиймати ошди ва бу биз учун яхши устунликдир», — деди у.

Молиявий эксперт Киран Магуайрнинг тушунтиришича, уч йил давомида рухсат этилган 39 миллион фунт стерлинглик зарар лимити ошиб кетишига футболчилар шартномаларида кўзда тутилган Премер-лигага чиқиш бонуслари сабаб бўлган. Одатда бундай бонусларнинг умумий қиймати бир жамоа учун 10–15 миллион фунтни ташкил этади ва айнан шу тўловлар клубни «беихтиёр лимитдан чиқариб юборган».

Клуб Давид Акинтола, Aбу Камара ва Kайл Палмер бўйича тушадиган таклифларни кўриб чиқишга тайёр. Шу билан бирга, бир нечта Чемпионшип клублари қизиқиш билдирган ҳужумчи Kайл Жозефнинг трансфери тақчилликнинг катта қисмини қоплаши мумкин.

Шу билан бирга, «Ҳалл Сити» жамоанинг асосий футболчилари билан хайрлашиш ниятида эмас. Улар орасида мавсумнинг энг яхши ўйинчиси деб топилган Rиган Слейтер ҳамда ёш ҳимоячи Чарли Ҳюз бор. Уларнинг ҳар иккиси бўйича ҳам аллақачон сўровлар келиб тушган.