«Монако» ҳужумчиси Фоларин Балогун Англия Премер-лигасига қайтиш режаси бор-йўқлиги ҳақида фикр билдирди.
Америкалик форвард ёзги трансферлар ойнаси сўнгги кунларида «Эвертон»га ўтиши мумкин эди, аммо тиббий кўрикдан кейин трансфер амалга ошмай қолган.
«Келажакда АПЛга қайтишни хоҳлармидим? Ҳа, эҳтимол. Футболда кутилмаган воқеалар кўп бўлади. Жаҳон чемпионатидан кейин ҳам бунга яна бир бор гувоҳ бўлдик. Ёзда ушбу трансферга жуда яқин эдим, аммо келишув амалга ошмади. Шунга қарамай, келажакда Англияга қайтишим, албатта, мумкин», — деди Балогун talkSPORT нашрига.
Эслатиб ўтамиз, Балогун «Арсенал» академияси тарбияланувчиси ҳисобланади. У Франция чемпионатида «Реймс» ва «Монако»да клубларида ўйнашга муваффақ бўлди. Жаҳон чемпионатидан сўнг унга Европанинг кўплаб жамоаларидан таклифлар бўлмоқда.
