Мадриднинг «Реал» клуби ҳужумчиси Килиан Мбаппе тиззасидан олган жароҳатидан сўнг, биринчи машғулотини ўтказди, деб хабар бермоқда AS. Ҳужумчи 5 октябр, душанба куни кечқурун Валдебебасдаги клуб базасида жамоадан алоҳида машғулот ўтказди.
Қайд этилишича, Мбаппе спорт залида ишлаган, физиотерапевтлар билан шуғулланган, сўнгра майдонга тушган. У тўп билан машқларни эҳтиёткорлик билан бажарди ва жисмоний тайёргарлиги устида иш олиб борди. Маълум қилинишича, бугун, 6 октябр куни франциялик футболчи клуб базасига соат 9:10 да етиб келган, ваҳоланки жамоанинг машғулоти 10:30га режалаштирилган эди.
Эслатиб ўтамиз, Килиан 10 кун аввал Франция миллий жамоасининг Туркияга қарши ўйинида чап тиззасидан жароҳат олган эди. Текширув натижасида чап тизза орқа капсуласининг гиперекстензияси аниқланди. Ҳужумчи ўтган мавсумда айнан шу тиззаси пайларидан жиддий жароҳат олгани сабабли, клубда хавотирлар пайдо бўлди. Тикланиш 10-12 кун давом этиши кутилган эди. Мбаппе 10 октябр, шанба куни «Вилярреал» билан ўйнаши ҳам эҳтимолдан холи эмас.
