Argentina milliy jamoasi yarimhimoyachisi Enso Fernandes JCh-2026 finalida Ispaniyaga qarshi bahsda maydondan chetlatilgach, ijtimoiy tarmoqlar orqali muxlislarga murojaat qildi.
Eslatib o‘tamiz, finalning 90+3-daqiqasida «Chelsi» futbolchisi Pau Kubarsiga nisbatan qo‘pol harakati uchun ikkinchi sariq kartochkani olib, maydonni tark etgandi. Oradan ko‘p o‘tmay, Ferran Torres qo‘shimcha bo‘limda yagona golni urdi va Ispaniya 1:0 hisobida g‘alaba qozonib, jahon chempioniga aylandi.
Finaldan bir kun o‘tib, Fernandes Instagram sahifasida quyidagi murojaatini e'lon qildi:
«Vaqt o‘tishi bilan natijadan ham muhimroq narsalar borligini tushunasan. Bu jamoa yillar davomida mamlakatimizni munosib himoya qilib kelmoqda. Ular bizga raqobat faqat g‘alaba qozonish emas, balki futbolka uchun oxirigacha kurashish va hech qachon taslim bo‘lmaslik ekanini o‘rgatdi. Har doim xarakter ko‘rsatgan, eng yuqori darajada raqobatlashgan va bu ranglarni g‘urur, kamtarlik hamda fidoyilik bilan himoya qilgan jamoaning bir qismi bo‘lish men uchun sharaf.»
Shuningdek, yarimhimoyachi mundial davomida jamoani qo‘llab-quvvatlagan argentinalik muxlislarga alohida minnatdorlik bildirdi.
«Barcha argentinalik muxlislarga rahmat. Har bir bahsda bizni qo‘llab-quvvatlaganingiz, mehringiz va cheksiz ishonchingiz uchun minnatdorman. Sizlar tufayli dunyoning qayerida bo‘lmaylik, o‘zimizni uyimizdagidek his qilamiz.»
So‘ngida Fernandes Argentina sharafini himoya qilish faoliyatidagi eng katta faxr ekanini ta'kidladi.
«Mamlakatim libosini kiyish — faoliyatimdagi eng katta sharaf. Uni himoya qilish imkoniyati bo‘lgan har safar bor kuchimni berishda davom etaman.»
Qayd etish joiz, FIFA final hushtagidan keyin yuzaga kelgan tartibsizliklar va ayrim futbolchilarning xatti-harakatlari yuzasidan tekshiruv boshlagan.
Muxlislar bu yangilikni Telegram’da muhokama qilmoqda
Izohlar Telegram’da ochiladi