Аргентина миллий жамоаси яримҳимоячиси Энцо Фернандес ЖЧ-2026 финалида Испанияга қарши баҳсда майдондан четлатилгач, ижтимоий тармоқлар орқали мухлисларга мурожаат қилди.
Эслатиб ўтамиз, финалнинг 90+3-дақиқасида «Челси» футболчиси Пау Кубарсига нисбатан қўпол ҳаракати учун иккинчи сариқ карточкани олиб, майдонни тарк этганди. Орадан кўп ўтмай, Ферран Торрес қўшимча бўлимда ягона голни урди ва Испания 1:0 ҳисобида ғалаба қозониб, жаҳон чемпионига айланди.
Финалдан бир кун ўтиб, Фернандес Instagram саҳифасида қуйидаги мурожаатини эълон қилди:
«Вақт ўтиши билан натижадан ҳам муҳимроқ нарсалар борлигини тушунасан. Бу жамоа йиллар давомида мамлакатимизни муносиб ҳимоя қилиб келмоқда. Улар бизга рақобат фақат ғалаба қозониш эмас, балки футболка учун охиригача курашиш ва ҳеч қачон таслим бўлмаслик эканини ўргатди. Ҳар доим характер кўрсатган, энг юқори даражада рақобатлашган ва бу рангларни ғурур, камтарлик ҳамда фидойилик билан ҳимоя қилган жамоанинг бир қисми бўлиш мен учун шараф.»
Шунингдек, яримҳимоячи мундиал давомида жамоани қўллаб-қувватлаган аргентиналик мухлисларга алоҳида миннатдорлик билдирди.
«Барча аргентиналик мухлисларга раҳмат. Ҳар бир баҳсда бизни қўллаб-қувватлаганингиз, меҳрингиз ва чексиз ишончингиз учун миннатдорман. Сизлар туфайли дунёнинг қаерида бўлмайлик, ўзимизни уйимиздагидек ҳис қиламиз.»
Сўнгида Фернандес Аргентина шарафини ҳимоя қилиш фаолиятидаги энг катта фахр эканини таъкидлади.
«Мамлакатим либосини кийиш — фаолиятимдаги энг катта шараф. Уни ҳимоя қилиш имконияти бўлган ҳар сафар бор кучимни беришда давом этаман.»
Қайд этиш жоиз, ФИФА финал ҳуштагидан кейин юзага келган тартибсизликлар ва айрим футболчиларнинг хатти-ҳаракатлари юзасидан текширув бошлаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади