Бразилиялик футболчи Неймарнинг отаси Неймар да Силва «Сантос» клубининг бош директори лавозимини эгаллади. Бу ҳақда клуб президенти Марсело Тейшейра ва тадбиркорнинг ўзи маълум қилди.
Globo Esporte нашрига кўра, Неймарнинг отаси клубнинг стратегик ривожланиши учун жавоб беради. Шунингдек, у ёш футболчилар фаолиятини қўллаб-қувватловчи Meninos da Vila институтига раҳбарлик қилади.
У декабр ойигача ушбу вазифада ишлайди. Агар 12 декабрдаги сайловда Тейшейра қайта президент этиб сайланса, Неймарнинг отаси лавозимини сақлаб қолади.
Аввалроқ Неймар да Силва NR Sports компанияси орқали «Сантос» фаолиятида иштирок этган. Жумладан, «Вила Белмиро» стадионини таъмирлаш ва ёшлар академияси инфратузилмасини яхшилаш лойиҳаларига кўмаклашган.
Ушбу лойиҳаларга 8 миллион реал, яъни тахминан 1,3 миллион евро сармоя киритилган.
