«Манчестер Юнайтед» клуби ва Англия миллий жамоасининг собиқ ҳимоячиси Рио Фердинанд Криштиану Роналдунинг фаолиятидаги энг муҳим ютуқ ҳақида фикр билдирди. Унинг таъкидлашича, португалиялик футболчининг энг катта муваффақияти фақат голлар, рекордлар ёки совринлар билан боғлиқ эмас.
«Унинг энг муҳим ютуғи — профессионаллик ҳақидаги тасаввурларни ўзгартиргани. Роналду ишга профессионал ёндашув, жисмоний тайёргарлик, спортдаги узоқ фаолият, саломатликка эътибор ва энг кичик деталларгача аҳамият бериш борасида янги стандартларни ўрнатди.
У фаолиятини узайтириш ва ўзининг энг яхши футболини намойиш этиш имкониятини ошириш учун бор кучини ишга солишга тайёрлиги билан бошқаларга намуна бўлди», — деди Фердинанд ўзининг Rio Ferdinand Presents номли YouTube каналида.
Маълумот учун, Фердинанд ва Роналду 2003–2009 йиллар давомида «Манчестер Юнайтед» сафида бирга ўйнаган. Улар Англия чемпионати ва Европа Чемпионлар лигасида ғолиб чиққан.
Эслатиб ўтамиз, 41 ёшли Криштиану Роналду 5 ноябр куни Португалия миллий жамоасидаги фаолиятини якунлаганини эълон қилди. Ҳужумчи мамлакат бош жамоаси сафида 234 та баҳсда 146 та гол ва 45 та голли узатмага муаллифлик қилган.
