«Ливерпул» ва Англия миллий жамоасининг собиқ яримҳимоячиси Стивен Жеррард ЖЧ-2026 бўйича ўз прогнозларини эълон қилди.
Мутахассиснинг фикрича, мундиал бош соврини учун асосий даъвогарлар Франция ва Аргентина миллий жамоаларидир.
Бироқ у якуний танлов қилиш керак бўлса, Францияни устун кўришини айтди.
«Жаҳон чемпионатида Франция ёки Аргентина ғолиб бўлади. Агар улардан бирини танлашим керак бўлса, Францияни танлайман», — деди Жеррард.
Шунингдек, инглиз футболи афсонаси турнирнинг индивидуал совринлари бўйича ҳам ўз тахминларини билдирди.
Унга кўра:
Энг яхши тўпурар — Хулиан Алварес;
Энг яхши дарвозабон — Эмилиано Мартинес;
Турнирнинг энг яхши футболчиси — Лионел Месси;
Энг яхши ёш футболчи — Ламин Ямал.
Жеррард турнирнинг асосий сенсацияси Жанубий Америка жамоаларидан бири бўлиши мумкинлигини ҳам айтди.
«Менимча, турнир кашфиёти Жанубий Америка жамоаларидан бири бўлади. Масалан, Уругвай», — деди у.
Собиқ футболчи «Олтин тўп» соврини масаласида эса Ҳарри Кейн номзодини илгари сурди.
«Умид қиламанки, «Олтин тўп» Ҳарри Кейнга насиб қилади», — дея қўшимча қилди Жеррард.
