«ПСЖ» ҳужумчиси Бредли Баркола жамоани тарк этиш имкониятини кўриб чиқмоқда. Бу ҳақда ТEАМtalk нашри хабар берди.
Манбага кўра, франциялик футболчи клубдаги ҳозирги мақомидан норози. Айниқса, у УEФА Чемпионлар лигаси ярим финали ва финал баҳсларида асосий таркибда майдонга тушмагани сабаб ҳафсаласи пир бўлган.
Қайд этилишича, мавсумнинг энг муҳим учрашувларида захирада қолиши Барколада мунтазам ўйин амалиётига эга бўлиш қийинлиги ҳақидаги фикрни кучайтирган.
Хабарларга қараганда, футболчи ўз истагини клуб раҳбариятига ҳам етказган.
«ПСЖ» вингер билан хайрлашишни истамаяпти, бироқ клуб Барколанинг норозилигини тушунмоқда.
22 ёшли футболчига Европанинг бир қатор гранд клублари қизиқиш билдирмоқда. Улар орасида «Арсенал», «Ливерпул», «Барселона», «Бавария» ва Мадриднинг «Реал» клублари бор.
2025/26 йилги мавсумда Баркола барча мусобақаларда 49 та учрашувда иштирок этиб, 13 та гол урди ва 7 та голли узатмага муаллифлик қилди.
Футболчининг «ПСЖ» билан амалдаги шартномаси 2028 йилнинг ёзига қадар мўлжалланган. Transfermarkt портали унинг трансфер қийматини 70 миллион еврога баҳоламоқда.
