Ўзбекистон миллий жамоасининг собиқ бош мураббийи Сречко Катанец Жаҳон чемпионати олдидан ўзбекистонлик мухлисларга мурожаат қилди.
Словениялик мутахассиснинг фикрича, мундиалда илк бор иштирок этаётган жамоадан дарҳол йирик натижалар кутиш тўғри эмас.
«Барча ўзбекларга битта гапим бор: Жаҳон чемпионатида жамоадан жуда катта натижалар кутманг. Бундай турнирда илк иштирокда кўзга кўринарли натижа қайд этиш жуда қийин», — деди Катанец.
Мутахассис мундиалда қатнашишнинг ўзи Ўзбекистон футболи учун тарихий қадам эканини алоҳида қайд этди.
«Бу жараён ва ривожланишнинг бир қисми. Мухлислардан ҳар бир лаҳзадан завқ олишларини сўрайман», — дея қўшимча қилди у.
Эслатиб ўтамиз, Сречко Катанец 2025 йил январ ойида соғлиғи билан боғлиқ муаммолар сабаб Ўзбекистон миллий жамоаси бош мураббийлигидан кетган эди.
Айнан унинг даврида Ўзбекистон миллий жамоаси Жаҳон чемпионати йўлидаги муваффақиятли юриш учун мустаҳкам пойдевор яратган ва тарихий натижа сари муҳим қадамлар ташлаган.
Маълумот учун, Ўзбекистон миллий жамоаси ЖЧ-2026 гуруҳ босқичида Португалия, Колумбия ва Конго ДРга қарши баҳс олиб боради.
