Португалия миллий жамоаси бош мураббийи Роберто Мартинес ҳужумчи Криштиану Роналду ҳақида илиқ фикрлар билдирди.
Мутахассиснинг таъкидлашича, 41 ёшли футболчи нафақат Португалия, балки бутун футбол тарихидаги энг ноёб шахслардан бири ҳисобланади.
«Биз афсонавий шахс — Криштиану Роналду ҳақида гапириш имкониятига эгамиз. У футболни ўзгартирган ноёб футболчи. Унинг футболга бўлган садоқати бугунги кунгача ёш футболчилар учун намуна бўлиб хизмат қилмоқда.
Миллий жамоа сафида 21 йил, 227 та баҳс. Бунга ҳеч бир футболчи эриша олмаган. Голлар сони ҳақида эса алоҳида гапириш мумкин. Айнан шу рақамлар Роналдуни афсонага айлантиради», — деди Мартинес.
Мураббий ҳужумчининг майдондаги таъсирига ҳам юқори баҳо берди.
«Роналдунинг марказий ҳужумчи сифатидаги ҳаракатлари, тўғри позиция танлаши, ҳужумларни якунлаши ва бўш ҳудудларни топа олиши жамоамизнинг энг катта кучларидан биридир.
Унинг кайфияти ва иштиёқи миллий жамоада илк бор ўйнаётган 18 ёшли футболчиникидек. Криштианунинг ўрнини босиб бўлмайди. Унга ўхшаган футболчини топишнинг имкони йўқ.
Албатта, келажакда турли ечимлар топиш керак бўлади. Аммо Роналдунинг натижадорлигини такрорлашнинг ўзи деярли имконсиз», — дея қўшимча қилди португалиялик мутахассис.
Маълумот учун, Роналду ҳозиргача Португалия миллий жамоаси сафида 227 та ўйинда майдонга тушиб, 170 дан ортиқ гол муаллифига айланган.
