Конго ДР миллий жамоаси АҚШга етиб борди

Конго ДР миллий жамоасига АҚШга киришга рухсат берилди. Бунгача улар ўз мамлакатида Эбола вируси тарқалгани туфайли штатларга киритилмаётганди.

1974 йилдан бери илк бор жаҳон чемпионатига чиққан Конго ДР миллий жамоаси мамлакатдаги Эбола тарқалиши сабабли режалаштирилган йиғинларни бекор қилди ва тайёргарликни Белгияда олиб борди.

Жамоа аъзолари Париждан амалга оширилган парвоз орқали Америкага етиб келишди. Олдинроқ АҚШ расмийлари улардан мамлакатга кириш учун 21 кунлик карантиндан ўтишни талаб қилганди.

«Биз вазиятга мослашдик. Доимий равишда шароитга кўникишга тўғри келди, шунинг учун диққатимизни йўқотмадик. Иккита қийин ўртоқлик баҳсини ўтказдик ва мана энди шу ердамиз. Бу — биз учун яна бир қадам.

Одамлар жамоамизни жаҳон чемпионатида кўрмаганига анча вақт бўлди. Финал босқичига чиқишга эришдик. Энди вазифамиз — турнирда яхши натижа кўрсатиш», — деди жамоа бош мураббийи Себастиан Десабр.

Мусобақа давомида конголик футболчилар Ҳюстон шаҳрида жойлашади. Улар 17 июн куни илк ўйинини Португалияга қарши ўтказади.

Шундан сўнг жамоа Гвадалахара шаҳрига йўл олади ва 23 июн куни Колумбия билан баҳслашади. Гуруҳ босқичидаги сўнгги ўйин эса 28 июн куни Атланта шаҳрида Ўзбекистон милдий жамоасига қарши бўлиб ўтади.