Эндо Япония миллий жамоасидаги фаолиятини якунлаганини эълон қилди

Япония сардори Ватару Эндо миллий жамоадаги фаолиятини якунлади.

Аввалроқ яримҳимоячи феврал ойида оёғидан ўтказилган операциядан кейин тикланиш жараёни секин кечаётгани сабабли жаҳон чемпионатини ўтказиб юбориши маълум қилинганди.

Шундан сўнг 33 ёшли футболчи Япония сафида бошқа ўйнамаслигини эълон қилди.

«Албатта, бу жаҳон чемпионатида иштирок эта олмаслигимдан жуда афсусдаман. Аммо бундан ҳам кўпроқ шу билан фахрланаманки, Қатардаги жаҳон чемпионатидан кейин сардор сифатида сизлар билан бирга бу жамоани олдинга бошлай олдим ва жаҳон чемпионатида ғалаба қозониш мақсади табиий ҳамда оддий ҳолга айланган жамоани шакллантиришга ҳисса қўшдим.

Ҳозирги миллиф жамоа ҳақиқатан ҳам ажойиб. Улар ҳар қандай қийинчиликни енгиб ўтиши ва биз учун ҳали кўрилмаган янги чўққиларни забт этишига ишонаман», — деб ёзди «Ливерпул» яримҳимоячиси.

Эндо Япония сафида 73 та ўйин ўтказиб, 4 та гол урган. У миллий жамоада 2015 йилда дебют қилган.