Хорватия миллий жамоаси яримҳимоячиси Лука Модрич футболчилик фаолиятини 2026 йилги Жаҳон чемпионатидан кейин якунлашга тайёр.
Инсайдер Николо Скиранинг хабар беришича, 40 ёшли футболчи Мадриднинг «Реал» клуби билан келажакдаги ҳамкорлик борасида келишувга эришган.
Манбага кўра, Модрич бутсаларини михга илгач, «қироллик клуби»да турли лавозимлардан бирида фаолият олиб боради.
Хорватиялик футболчи 2012 йилдан 2025 йилгача «Реал» сафида тўп тепди ва клуб тарихидаги энг буюк футболчилардан бирига айланди.
Бу давр мобайнида Модрич 4 марта Испания чемпионлигини қўлга киритди ҳамда 6 бор УEФА Чемпионлар лигаси ғолибига айланди.
2018 йилда эса у «Олтин тўп» совринини қўлга киритиб, мазкур мукофотни ютган илк хорватиялик футболчи сифатида тарихга кирди.
Эслатиб ўтамиз, Хорватия миллий жамоаси ЖЧ-2026 гуруҳ босқичида Англия, Панама ва Гана билан бир гуруҳдан жой олган.
Хорватлар мундиалдаги илк учрашувини 16 июн куни Англияга қарши ўтказади.
