«Ювентус» янги спорт директори Жованни Карневали тайинланганидан сўнг трансфер сиёсатини ўзгартиришни режалаштирмоқда. Бу ҳақда Football Italia маҳаллий ОАВларга таяниб хабар берди.
Манбага кўра, Турин клуби раҳбарияти бош мураббий Лучано Спаллеттига италиялик футболчилардан иборат мустаҳкам ўзакка эга жамоа шакллантиришда ёрдам бермоқчи.
«Бянконерилар»нинг асосий трансфер мақсадларидан бири «Ливерпул» ҳужумчиси Федерико Киеза ҳисобланади. Италиялик футболчи аввалроқ 2024 йилда Турин клубини тарк этишни истамаганини айтган ва қайтиш эҳтимолини истисно қилмаган эди.
Шунингдек, «Ювентус» «Ливерпул» ҳимоячиси Жованни Леонига ҳам қизиқиш билдирмоқда. Ёш футболчи ўтган мавсум дебют учрашувида хочсимон боғламларини узиб олгани сабаб деярли бутун мавсумни ўтказиб юборди.
Туринликлар «Фиорентина» яримҳимоячиси Шер Ндур фаолиятини ҳам диққат билан кузатмоқда. Яқинда Италия миллий жамоасида дебют қилган футболчи клубнинг узоқ муддатли режаларидан ўрин олган.
Хабарларга кўра, «Ювентус» эҳтимолий трансфер доирасида Фабио Миреттини таклиф қилиши ва қўшимча маблағ тўлаши мумкин.
Бундан ташқари, «Сассуоло» вингери Доменико Берарди ҳам Турин клубининг қизиқиш доирасига кирган. Трансфер амалга ошса, футболчи яна Карневали билан бирга ишлаш имконига эга бўлади.
Қайд этилишича, «Фиорентина» Ндурни келажак лойиҳасининг муҳим қисми деб ҳисобламоқда ва футболчини осонлик билан қўйиб юборишни режалаштирмаяпти.
