«Рома» бош мураббийи Жан Перо Гасперини Чемпионлар лигаси умумий босқичининг 4-турида «Манчестер Юнайтед»га қарши баҳсдаги 2:3 ҳисобидаги мағлубият ҳақида фикр билдирди. Римликлар беллашув давомида 2:0 ҳисобида олдинда бораётган бўлса-да, якунда имкониятни бой берди.
«Бу бошқача баҳс бўлди. Ўша ўйинда ҳаммаси стандарт вазиятлардан кейинги 7–8 дақиқа ичида ҳал бўлганди. Бугун эса пеналтидан кейин бундай ҳолат кузатилмади. Биз ўйинга керакли суръатни бера олмадик. Биринчи бўлимга нисбатан иккинчи бўлимда кучимиз етишмади.
Рақибнинг биринчи голи пеналтидан, иккинчиси эса жароҳат билан боғлиқ вазиятдан кейин, ўйин мувозанатга келган паллада урилди. Ушбу баҳс бизга «Реал» билан ўйинга қараганда кўпроқ маълумот берди. Бундан келгусида албатта фойдаланишимиз керак», — дея Гасперинининг сўзларини келтиради TuttoMercatoWeb.
Мутахассис иккинчи бўлимда «МЮ»нинг юқори прессингига қарши тўғри ечим топа олишмаганини ҳам тан олди.
«Рақибнинг йўқотадиган нарсаси қолмаганди ва улар юқори прессинг қўллади. Бу кутилган ҳолат эди. Биз бошқача ҳаракат қилишимиз, узун узатмалардан фойдаланишимиз керак эди. Аммо рақибнинг етакчи футболчиларини тўхтата олмадик. Балки кўпроқ яккакурашларга киришишимиз керак эди. Пеналтидан кейин, ҳисоб 2:2 бўлганида босим янада кучайди. Бу ғалабани сақлаб қолишимизга имкон бермади», — деди мураббий.
Маълумот учун, «МЮ» сафида Бруну Фернандеш 58-дақиқада пеналтидан гол урди. Матеус Куня эса 83 ва 86-дақиқаларда иккита гол киритиб, манкунианликларга ғалаба келтирди.
Эслатиб ўтамиз, ушбу ғалабадан сўнг «Манчестер Юнайтед» Чемпионлар лигаси умумий жадвалида олти очко билан 17-ўринга кўтарилди. Тўрт очкога эга «Рома» эса 19-поғонада бормоқда.
Мухлислар бу янгиликни Telegram’да муҳокама қилмоқда
Изоҳлар Telegram’да очилади