Туркия миллий жамоаси бош мураббийи Винченсо Монтелла АҚШга қарши ЖЧ-2026 гуруҳ босқичининг сўнгги тури олдидан футболчиларни танқид қилаётганларга муносабат билдирди.
Италиялик мутахассиснинг айтишича, кескин танқид футболчиларнинг руҳий ҳолатига салбий таъсир кўрсатмоқда.
«Кўряпмизки, футболчиларимиз қаттиқ танқид остида қолди ва бу уларга таъсир қилди. Руҳий жиҳатга ҳам эътибор қаратишимиз керак.
Агар жамоамизнинг шу пайтгача кўрсатган ўйинига назар ташласангиз, улар кўпроқ ҳурмат ва меҳрга лойиқ эканини кўрасиз.
Ростини айтсам, дастлабки икки баҳс статистикаси ҳам кўп нарсани англатади. Биз қўлимиздан келган барча ишни қилдик, аммо афсуски, натижага эриша олмадик.
Натижалар кутганимиздек бўлмади, бироқ биз жамоага келганимиздан бери ўйин сифати бўйича энг яхши статистик кўрсаткичларга эришдик.
Ҳар қандай вазиятда ҳам мухлисларимизнинг қўллаб-қувватлашига муҳтожмиз. АҚШга қарши баҳс биз учун жуда муҳим.
Футболчиларимиз сўнгги йилларда катта муваффақиятларга эришди. Биз айнан улар билан бирга шу йўлни босиб ўтдик. Шу боис мухлислардан ҳар қандай шароитда ҳам жамоани қўллаб-қувватлашни сўрайман», — деди Монтелла матбуот анжуманида.
Маълумот учун, Туркия миллий жамоаси ЖЧ-2026 гуруҳ босқичининг сўнгги турида АҚШга қарши майдонга тушади. Мазкур баҳс натижасидан қатъи назар, турклар D гуруҳини тўртинчи ўринда якунлайди.
