ФИФА ЖЧ-2026 плей-офф босқичидаги пеналтилар серияси қоидаларига ўзгартириш киритишни режалаштирмоқда.
Маълум қилинишича, ФИФА ушбу масала юзасидан футбол қоидаларини белгиловчи Халқаро футбол ассоциациялари кенгаши (IFAB) билан музокаралар олиб борган. Ўзгаришлар турнир давом этаётганига қарамай жорий этилиши мумкин.
Ҳозирги тартибга кўра, пеналтилар серияси олдидан иккита танга ташланади. Биринчиси қайси жамоа биринчи бўлиб зарба беришини, иккинчиси эса қайси дарвоза танланишини аниқлайди.
ФИФА эса фақат битта қуръа ташлаш тизимини жорий этишни таклиф қилмоқда. Унга кўра, қуръада ғолиб чиққан жамоа биринчи бўлиб танлов қилади — яъни биринчи зарбани тепиш ёки дарвозани танлаш ҳуқуқига эга бўлади. Мағлуб томон эса қолган вариантни танлайди.
ФИФА вакиллари ушбу ўзгариш пеналтилар сериясини янада адолатли қилишига ишонмоқда.
Маълумот учун, пеналтилар серияси қоидаларига ўзгартириш киритиш ваколати IFABга тегишли. Агар таклиф маъқулланса, янги тартиб ЖЧ-2026 плей-офф босқичидаёқ амалиётга жорий этилиши мумкин.
