Ўзбекистон футбол ассоциацияси матбуот хизмати миллий жамоа аъзоси Аббосбек Файзуллаев билан суҳбат уюштирди. Мазкур интервю давомида яримҳимоячи мундиалдаги илк ўйин ҳаяжонларини қандай енгиб ўтгани ҳақида гапириб берди.
«Чигилёзди машғулотига чиққанимиздаги дастлабки 10-15 дақиқа ўзимда бўлмадим, тўғриси. Чунки... Бу қандай ҳис-туйғулар эканлигини тасвирлаб бера олмайман, лекин худди кинога тушиб қолгандек бўлдим. Кейин ўша 10-15 дақиқадан кейин бу нарса ўтиб кетди.
Ўйин бошлангандан кейин эса барча ҳис-ҳаяжонлар ўчирилади. Шу сабабли уёғига майдонда ҳаяжон бўлмади. Ўйинга тайёр эдим. Чунки мен ҳам орзиқиб кутган ўйин. Ўзимни йиғиб олмасам, шунча миллионлаб халқимиз кўз тикиб турибди, стадионда дадам ҳам келган, яхши ўйин кўрсатмасам бўлмасди, бунга тайёр эдим. Айтганимдек, чигилёзди машғулотидаги дастлабки бир неча дақиқадан кейин ҳаммаси ўтиб кетди», - деди Аббосбек Файзуллаев.
Эслатиб ўтамиз, Ўзбекистон миллий жамоаси 23 июн куни 2-тур доирасида Португалияга қарши майдонга тушади.
