«Локомотив» бош мураббийи Мирко Еличич «Бунёдкор»га (4:1) қарши баҳсдан сўнг беллашув ҳақида фикр билдирди. Мутахассис рақиб айрим вазиятларда устунлик қилганини таъкидлади.
«Бу учрашувнинг осон ўтмаслигини олдиндан билардик. Айрим пайтларда рақиблар биздан устунлик қилишди. Ҳисобнинг 4:1 бўлиб кетгани ўйиннинг даражасини кўрсата олмайди. «Бунёдкор»нинг бундай қийин ҳолатда яхши кураш таклиф қилганидан хурсандман», — деди Еличич.
Мураббий дарвозабонлар масаласига ҳам тўхталди. Унинг айтишича, Никита Шевченко сўнгги уч учрашувда ўйин амалиётига эга бўлди, бироқ айни пайтда Алексей Козлов жамоанинг асосий дарвозабони ҳисобланади. Еличич йил охиригача захирадаги дарвозабонларга ҳам имконият беришни режалаштираётганини айтди.
Тажрибали футболчиларнинг жамоага қўшаётган ҳиссаси ҳақида гапирар экан, мутахассис уларнинг профессионаллиги ва ёш футболчиларга бераётган тажрибасини алоҳида қайд этди.
«Футболчи ўзини профессионал тутиб, ҳар томонлама ўзига қараса, 40 ёшгача ҳам футбол ўйнай олади. Бу йигитлар ўзларини профессионал каби тутишмоқда. Таркибдаги ёш футболчилар эса бу тажрибали инсонлардан кўп нарсаларни олишмоқда», — деди у.
Еличич «Локомотив»нинг турли тактик схемалардан фойдаланишига ҳам изоҳ берди. Унинг таъкидлашича, 4 ёки 5 ҳимоячи билан ўйнаш рақиб, таркибдаги футболчиларнинг сифати ва ўйин шароитига қараб белгиланади.
Мутахассис кетма-кет иккинчи учрашувда гол урган Жасур Яхшибоевни хавфли футболчи деб атади ва унинг жамоага катта ёрдам бераётганини таъкидлади.
Шунингдек, мураббий Темурхўжа Абдухолиқовнинг оғир ҳолатига тўхталиб, клуб унга ёрдам беришга ҳаракат қилаётганини билдирди.
«Темурхўжага раҳмат айтаман, у шу ҳолатдан чиқиб кетиш учун ҳаракат қилмоқда. Ўз навбатида биз ҳам унга ёрдам бериш учун қўлимиздан келганини қиляпмиз», — деди Еличич.
