Муаммолар гирдобида қолган «Бунёдкор» ютқазишда давом этяпти. Бу сафар улар «Локомотив»га 4:1 ҳисобида имкониятни бой беришди.Учрашувдан кейин «Бунёдкор» бош мураббийи Илёс Зейтуллаев матбуот анжуманида қатнашди.
— Ўйин ҳақида ҳозир ҳеч нарса дея олмайман. Чунки ҳозир футбол ҳақида гапиришга ҳам ҳеч қандай кайфият йўқ. Ростини айтсам, жуда қаттиқ хафа бўлдим. Уч мавсум давомида жамоа қуришга, меҳнат қилишга, ишлашга, таркибни шакллантиришга ҳаракат қилдик. Энди эса жамоа қандай парчаланиб кетганини кўриб турибман. 14–15 нафар футболчи жамоани тарк этди. Кимдир буни шунчаки ҳазил ёки қандайдир ўйин деб ўйлаши мумкин. Лекин мен учун бу — барибир обрў, карьера масаласи. Мен футболни яхши кўраман. Шунинг учун бугун йигитларимизни кўриб турибман: улар кўп йиллар давомида Суперлигада ўйнаган тажрибали футболчиларга қарши майдонга тушишди. Шунга қарамай, ҳаракат қилишди, бор кучларини беришди. Шу жиҳатдан уларга раҳмат айтиш керак.
Ўйлайманки, бизда муаммолар жуда кўп ва вазиятнинг қанчалик оғир эканини ўзингиз ҳам яхши биласиз. Мен учун энг сўнгги томчи эса барча ёрдамчиларим кетиб қолаётгани бўлди. Улар бу ердан кетишяпти. Бу мен учун жуда катта зарба. Чунки биз бу ерга биргаликда келганмиз, уларни мен олиб келганман. Ҳозир эса улар Ўзбекистонни тарк этишяпти. Бу ҳақда менга хабар беришди. Шунинг учун менга оғир ботяпти. Билмайман, ҳаёт шу. Балки бу жамоага, айниқса, ёш футболчиларга янги энергия керакдир. Балки улар яна ёниб, чемпионатнинг қолган қисмини янги куч, янги энергия билан ўтказишлари керакдир. Чунки сўнгги ўйинларда, ростини айтсам, балки муаммо менинг ўзимдадир. Чарчоқ туфайли уларга аввалгидек энергия бера олмаётгандирман. Мен ҳам инсонман, мен ҳам чарчайман, менинг ҳам оилам бор. Шунинг учун, менимча, ҳозир олдинга ҳаракат қилиш жуда қийин бўлган бир нуқтага келдик. Ўз штабимсиз, ўз ёрдамчиларимсиз бу ерда давом этишнинг маъноси бор, деб ўйламайман.
— Бу ҳолат, аслида, сизнинг обрўингизга ҳам жиддий таъсир қилади. Айниқса, сизга. Чунки икки йил аввалги фаолиятингизга жуда юқори баҳо берган эдик. Жамоадан кетиш ҳақида ўйламаяпсизми?
— Агар мен кетишим керак бўлса... ва агар бу жамоага ёрдам берса, уни қандайдир янги энергия билан яна «ёқиш»га хизмат қилса, жамоада янгилик пайдо бўлса, балки янги мураббий келар. Шунинг учун раҳбарият билан гаплашиб кўришни ўйлаяпман. Чунки ростини айтсам, мен жуда қаттиқ чарчадим. Футболчиларнинг қалбида яна олов ёниши учун, эҳтимол, янги энергия керакдир. Балки бошқа инсон келиб, иш услубини ўзгартирар. Менинг усулларим эмас, балки бошқа усуллардан фойдаланар. Лекин ҳозир мен шуни кўряпманки, уларга менинг энергиям етарли бўлмаяпти. Буларнинг барчаси қандай содир бўлаётганини кўриш мен учун жуда оғриқли. Чунки сўнгги томчи — айнан ёрдамчиларимдан эшитган гапларим бўлди. Улар бу ерда қолишдан чарчаганини айтишди. Бундай вазиятда улар ҳам содир бўлаётган воқеалардан маъно кўрмаяпти: олти-етти ой маошсиз…
Улар менга ёрдам беришни хоҳлашди, мен учун ва йигитлар учун қолишди. Лекин энди улар кетишларини айтишди. Шу сабабли бу мен учун сўнгги томчи бўлди. Мен кўп бор ҳаракат қилдим, эшик қоқдим, жуда кўп гапирдим. Лекин билмайман... Ҳозирги ҳолат — жамоа парчаланиб кетганининг аниқ факти. Мен биринчи йил келганимда охирги ўринда эдик ва мавсумни 10-ўринда якунлаб, жамоани сақлаб қолган эдик. Кейинги йили Ўзбекистон чемпионатида 5-ўринни эгалладик. Бу йил эса 3–4-ўринларда бораётган эдик. Жамоа парчалана бошлаганидан кейин эса натижани ҳозир ўзингиз кўриб турибсиз. Мураббий сифатида мен ўз зиммамга масъулиятни оламан — менга боғлиқ бўлган барча нарса учун жавоб бераман. Ҳатто менга боғлиқ бўлмаган нарсалар учун ҳам масъулиятни ўз зиммамга оляпман. Балки ҳар бир инсон клуб ва бутун ташкилотнинг ҳолати учун доимо ўз масъулиятини ҳис қилиши керакдир.
— Жиддий савол бермоқчиман. Хоҳласангиз, жавоб бермаслигингиз мумкин. Балки савол провокацион туюлиши ҳам мумкин. Сизнингча, жамоанинг бундай аҳволга тушишига ким сабабчи? «Бунёдкор»нинг бугунги ҳолатга келишига ким айбдор, деб ўйлайсиз? Хоҳласангиз, жавоб берманг.
— «Бунёдкор»нинг бундай вазиятга тушиб қолишига ким сабабчи, демоқчимисиз? Бу савол менга берилмаслиги керак, деб ўйлайман. Менга ва мураббийлар штабига боғлиқ бўлган ишлар — биз уларни қилдик. Биз ўз вазифамизни бажардик. Лекин бу ерда жуда чуқур масалалар бор. Жуда чуқур масалалар. Ҳатто ким айбдор экани менга қизиқ ҳам эмас. Бу савол менга эмас», - дея Илёс Зейтуллаевнинг сўзларини келтиради Tribuna.uz журналисти.
