Аргентиналик журналист Ариел Сеносяин Хулиан Алварес бўйича «Арсенал»нинг таклифи ҳақида маълумот берди.
Унинг сўзларига кўра, Микел Артета бошчилигидаги клуб 125 миллион евро ва бонуслар сифатида яна 10 миллион евро таклиф қилишга тайёр бўлган. «Атлетико» ушбу сумма эвазига футболчини сотишга рози бўларди, бироқ Алварес трансферни рад этган.
Аввалроқ ҳужумчи «Барселона»га ўтишни истаётгани ҳақида хабарлар тарқалган эди. Алварес «Вилярреал» билан 2:2 ҳисобидаги баҳсдан сўнг Мадрид жамоасининг илк машғулотини касаллиги сабабли ўтказиб юборган.
«Хулиан Микел Артетага рад жавобини берди. «Арсенал» 125 миллион евро ва 10 миллион евро бонус тўлашга тайёр эди. «Атлетико» шу суммага уни Англия клубига сотган бўларди», — деди Сеносяин.
Маълумот учун, журналистнинг фикрича, ҳозирда футболчи учун ягона эҳтимолий вариант «Барселона»нинг трансфер ойнаси ёпилишидан олдин янги таклиф билан чиқиши ҳисобланади.
