«Arsenal» Alvares uchun 135 million yevro taklif qilishga tayyor bo‘lgan

Argentinalik jurnalist Ariel Senosyain Xulian Alvares bo‘yicha «Arsenal»ning taklifi haqida ma’lumot berdi.

Uning so‘zlariga ko‘ra, Mikel Arteta boshchiligidagi klub 125 million yevro va bonuslar sifatida yana 10 million yevro taklif qilishga tayyor bo‘lgan. «Atletiko» ushbu summa evaziga futbolchini sotishga rozi bo‘lardi, biroq Alvares transferni rad etgan.

Avvalroq hujumchi «Barselona»ga o‘tishni istayotgani haqida xabarlar tarqalgan edi. Alvares «Vilyarreal» bilan 2:2 hisobidagi bahsdan so‘ng Madrid jamoasining ilk mashg‘ulotini kasalligi sababli o‘tkazib yuborgan.

«Xulian Mikel Artetaga rad javobini berdi. “Arsenal” 125 million yevro va 10 million yevro bonus to‘lashga tayyor edi. “Atletiko” shu summaga uni Angliya klubiga sotgan bo‘lardi», — dedi Senosyain.

Ma’lumot uchun, jurnalistning fikricha, hozirda futbolchi uchun yagona ehtimoliy variant «Barselona»ning transfer oynasi yopilishidan oldin yangi taklif bilan chiqishi hisoblanadi.