Марокаш миллий жамоаси ҳимоячиси Ашраф Ҳакими Жаҳон чемпионатидаги Бразилияга қарши баҳс олдидан ўз жамоасининг имкониятларига юқори баҳо берди.
«ПСЖ» футболчисининг таъкидлашича, Африка қитъасида Марокаш миллий жамоасини «Африка Бразилияси» деб аташади.
«Африкада бизни «Африка Бразилияси» дейишади. Биз Бразилия миллий жамоасини, уларнинг даражаси ва таркибидаги футболчиларни яхши биламиз. Бироқ бизда ҳам сифатли футболчилар бор ва биз кучли жамоадамиз.
Менимча, марокашлик мухлисларнинг қўллаб-қувватлаши билан катта натижаларга эришишга тайёрмиз. Миллий жамоамиз ушбу Жаҳон чемпионатида ажойиб футбол намойиш этади», — деди Ҳакими.
Эслатиб ўтамиз, Бразилия ва Марокаш ўртасидаги баҳс ЖЧ-2026 гуруҳ босқичининг 1-тури доирасида 14 июн куни АҚШнинг Ист-Ратерфорд шаҳридаги «Метлайф» стадионида бўлиб ўтади.
Маълумот учун, C гуруҳидан Бразилия, Марокаш, Шотландия ва Ҳаити миллий жамоалари ўрин олган.
