Gana milliy jamoasi yarimhimoyachisi Tomas Partining Kanadaga kirish taqiqi bo‘yicha bergan apellyatsiyasi rad etildi. Bu haqda jurnalist Ben Jeykobs xabar berdi.
Avvalroq 33 yoshli futbolchiga Angliyada zo‘rlash bilan bog‘liq bir necha ayblovlar qo‘yilgani sababli Kanadaga kirishga ruxsat berilmagandi.
Ma’lumotlarga ko‘ra, seshanba kuni Ottava sudi Partining apellyatsiyasini ko‘rib chiqib, avvalgi qarorni o‘z kuchida qoldirgan.
Shu tariqa, yarimhimoyachi JCH-2026 doirasida Gana terma jamoasiga yordam bera olmaydi.
Gana terma jamoasi mundialdagi ilk uchrashuvini 17 iyundan 18 iyunga o‘tar kechasi Torontoda Panama terma jamoasiga qarshi o‘tkazadi.
Eslatib o‘tamiz, Kanada immigratsiya organlari qarorini futbolchiga nisbatan Buyuk Britaniyada davom etayotgan sud jarayonlari bilan izohlagan.
2025/26 yilgi mavsumda Parti Ispaniyaning «Vilyarreal» klubi safida to‘p surib, La Ligada 25 ta uchrashuvda maydonga tushgan.
