Улуғбек Бақоев: «Дориев ёш футболчиларимиз, умуман барча учун намуна»

Ғузорда «Машъал» ҳамда «Сўғдиёна» жамоалари ўртасидаги ўйинда меҳмонлар 1:3 ҳисобида муҳим ғалабани қўлга киритди. Дориев ҳет-трикка эришиб, жиззахликларнинг ғалабасини таъминлади. Ўйиндан кейин «Сўғдиёна» бош мураббийи Улуғбек Бақоев матбуот анжуманида иштирок этди.

- Ўйинни яхши бошладик. Дастлабки ҳужумдаёқ вазият яратдик ва тезда гол урдик. Биринчи бўлим давомида ўйинни назорат қилдик, яна бир нечта яхши имкониятларимиз ҳам бўлди. Иккинчи бўлимда ҳам худди шундай бўлди: тез орада иккинчи голни, кейин учинчи голни урдик ва шундан кейин ўйнаш анча осонлашди. «Машъал»ни яхши биламиз. Бу жамоанинг тезкор қарши ҳужумлари, қанотлардан уюштирадиган ҳужумлари хавфли эканини олдиндан таҳлил қилгандик. Кетма-кет иккита мағлубиятдан кейин бугунги ғалаба йигитларга, аввало, руҳий жиҳатдан катта кўтаринкилик берди. Бу натижа турнир жадвали нуқтаи назаридан ҳам муҳим эди. Шу боис футболчиларни ғалаба билан табриклайман. Энди эса чемпионатнинг кейинги учрашувларига тайёргарлик кўришда давом этамиз.

- Улуғбек ака, «Машъал»нинг биринчи бекор қилинган голи эпизодида сиз ён ҳакамга кескин эътироз билдирдингиз ва бу ҳолат гол бекор қилингунига қадар давом этди. Ҳатто бунинг учун сариқ карточка ҳам олдингиз. Нега айнан ён ҳакамга бунчалик эътироз қилдингиз?

- Мен вазиятни шундай кўрдимки, «Машъал»нинг ҳужуми вақтида уларнинг футболчиси тўпни қўли билан ўйнади. Демак, ўша вазиятнинг ўзида ўйин тўхтатилиши керак эди. Аммо ўйин давом этди ва улар гол уришди.
Шундан кейин ҳакам билан гаплашдим ва кўрганимни айтдим: футболчининг қўлига тўп текканини кўрдим. Бу қоида бузилиши эди, шунинг учун гол ҳисобга олинмаслиги керак деб ҳисобладим. Гап шундан иборат.

- Ғалаба қозонаётган бўлсангиз ҳам ёш ҳужумчиларга унча кўп имконият бермаётгандек кўринасиз...

- Майдонда ўйнаш учун футболчи, аввало, бунга муносиб эканини исботлаши керак. Унинг савияси жамоа талабига мос келадими ёки йўқми — буни машғулотлар ва ўйинлар кўрсатади. Ким нимага қодир бўлса, шунга яраша имконият олади. Шу сабаб бугун айрим футболчиларга дам бердик, айримларига кўпроқ вақт бердик, бошқаларига эса ўзини кўрсатиш имконини яратдик. Баъзилари кеча ҳам ўринбосарлар таркибида майдонга тушган эди. Бу одатий жараён. Албатта, ёшлар кўпроқ ўйнашини истаймиз. Лекин ҳозирги вазият шундайки, ҳар қандай хато голга сабаб бўлиши мумкин. Футболда эса кейин ҳар нарса юз бериши эҳтимолдан ҳоли эмас. Шу боис биз рақибни ҳам, футболни ҳам ҳурмат қиламиз. Кераксиз таваккал қилмаймиз ва футболчиларга айни пайтда зарур бўлган вақтни берамиз.

- Дориевнинг жамоа билан шартномаси қанча муддатга тузилган?

- Яқинда унинг шартномаси узайтирилди. Адашмасам, уч ёки тўрт йилга. Аниқ муддатини билмайман, бу масалани раҳбарият яхши билади.
Лекин бугун ўзингиз ҳам кўрдингиз: унинг ижрочилик маҳорати, футбол сифати, фидойилиги ва ғалабага бўлган интилиши жуда юқори. Ўйин вақтида қандай иштиёқ билан ҳаракат қилишини кўряпсиз. У бизнинг ёш футболчиларимиз учун, умуман барча учун намуна. Легионер футболчи майдонда қандай ҳаракат қилиши кераклигининг ҳам ёрқин намунаси. У нафақат голлар уриб, жамоага натижа келтиряпти, балки руҳий жиҳатдан ҳам катта ёрдам бермоқда, ёш футболчиларнинг ривожланишига ҳам ижобий таъсир кўрсатяпти. Шунинг учун унга шахсан катта раҳмат айтаман.