Бразилия миллий жамоасининг собиқ ҳужумчиси Роналдо Неймарни миллий жамоага қайтариш қарорини қўллаб-қувватлашини айтди.
«Албатта, мен унинг қайтишини қўллаб-қувватладим. Бунинг сабаби жуда оддий — Неймар ўйин тақдирини ҳал қила оладиган футболчи. Ҳозирги Бразилияда якка ўзи жамоага ғалаба келтира оладиган бошқа футболчини кўрмаяпман.
Шу сабабли, агар бизда ундан фойдаланиш имконияти бўлса, бундан воз кечмаслигимиз керак. У шифокорлардан рухсат олди, жисмоний ҳолати яхши. Энди эса унга ишонмаганларнинг овозини ўчириш имконияти бор.
Мен ҳам 2002 йилда катта қайтишни бошдан кечирганман. Шу боис Неймарни тўлиқ қўллаб-қувватлайман», — деди Роналдо.
Афсонавий ҳужумчи Неймарнинг асосий таркибда майдонга тушишини интиқлик билан кутаётганини ҳам яширмади.
«Мен бундан жуда ҳаяжондаман ва бу қарорни тўлиқ қўллаб-қувватлайман. 34 ёшида у ўз иқтидорини исботлаши шарт эмас. Аммо унинг ўйини уни аллақачон ҳисобдан чиқарганларнинг барчасини жим қилишига умид қиламан.
Чунки буюк спортчининг муваффақиятли қайтишини кўришдан-да ёқимлироқ нарса йўқ», — дея қўшимча қилди Роналдо.
