«РБ Лейпциг» вингери Ян Диоманде ёзги трансфер ойнасида жамоасини тарк этадиган бўлса, фаолиятини «ПСЖ»да давом эттиришни афзал кўрмоқда.
Тhe Athletic хабарига кўра, Кот-д'Ивуар миллий жамоасининг 19 ёшли футболчиси Париж клуби лойиҳасини ўзи учун энг жозибадор вариант деб ҳисобламоқда. Диоманде «ПСЖ» президенти ва бош мураббийининг иш услубини юқори баҳолайди ҳамда айнан Парижда мунтазам равишда совринлар учун курашиш ва келажакда «Олтин тўп»га даъвогарлик қилиш имконияти кўпроқ деб ҳисоблайди.
Аввалроқ «Ливерпул» футболчи учун қарийб 100 миллион евро таклиф қилганди. Бироқ «РБ Лейпциг» бу таклифни рад этиб, ўз етакчиси учун 130 миллион еврога яқин маблағ олишни режалаштирмоқда. Шунингдек, немис клуби Диоманде билан шартномани узайтиришга ҳам умид қилмоқда. Унинг амалдаги битими 2030 йилнинг ёзига қадар амал қилади.
Эслатиб ўтамиз, Диоманде ўтган ёзда «Леганес»дан «РБ Лейпциг»га кўчиб ўтган эди. У Бундеслигадаги дебют мавсумида 33 та учрашувда 12 та гол уриб, 9 та голли узатмани амалга оширди ва жамоасининг Чемпионлар лигаси йўлланмасини қўлга киритишига катта ҳисса қўшди.
Айни пайтда Диоманде Кот-д'Ивуар билан ЖЧ-2026 1/16 финалида Норвегияга қарши баҳсга тайёргарлик кўрмоқда.
