Мирко Еличич: «Уч очкони қўлдан чиқариш ёқимсиз»

Суперлиганинг 17-турида «Локомотив» клуби Қўқонда 2:1 ҳисобида мағлубиятга учради. Ўйиндан кейин меҳмонлар бош мураббийи Мирко Еличич матбуот анжуманида иштирок этди.

- Биз икки марта хатога йўл қўйдик ва бу хатолардан кейин икки гол ўтказиб юбордик. Албатта, бу қийин ҳолат. Лекин умуман олганда, жиддий муаммо йўқ эди, ўйин назоратимиз остида бўлди. Майдон, албатта, яхши ҳолатда эмас эди. Шундай майдонда муносиб футбол намойиш этган йигитларимизга раҳмат. Албатта, мен учун уч очкони қўлдан чиқариш ёқимсиз. Чунки ўйин нуқтаи назаридан, йигитларнинг ҳаракати ва интилишини ҳисобга олсак, бу натижа аламли.
Бугун жамоамизга маълум даражада босим борлиги сезилди. Бу, айниқса, ўйиннинг бошида бироз кўринди. Бундай вазиятдан қочиб қутулиб бўлмайди — бу реал ҳолат. Шунинг учун оғир вазиятда ўзларини қўлга олиб, хатоларини тўғрилай олган футболчиларимизга миннатдорчилик билдираман.

- Темурхўжа Абдуҳолиқовнинг оиласида юз берган йўқотиш жамоанинг стратегик вазифаларига қай даражада таъсир қилади?

- Тима статистик кўрсаткичлар бўйича бу йил лигадаги энг яхши футболчилардан бири. У бизга нафақат статистикаси билан ёрдам беради, балки жамоадаги инсон сифатида ҳам жуда катта аҳамиятга эга. Базада унга нисбатан бўлган ҳурматни ҳам алоҳида таъкидлаш мумкин. Албатта, бу биз учун катта йўқотиш. Футболда бундай ҳолатлар бўлиб туради. Энди биз бу вазиятни қандай тўғрилаш ва олдинга қандай йўл топиш ҳақида ўйлашимиз керак.

Албатта, бу ёқимсиз ҳолат. Футболчини нафақат жисмоний жиҳатдан йўқотиш, балки психологик томондан ҳам таъсир қилади.

- Никита ўз вазифаларини қай даражада бажара олади? У тўлиқ куч билан ўйнай оладими?

- Никита анча вақт ўйнамаган. Лекин, биласизми, ҳар қандай футболчига бўлгани каби, унга ҳам вақт керак. Ҳозир у ўзини анча қулай ҳис қиляпти. Вақт ўтиши билан ўзига бўлган ишончи ҳам ортади.

Бу тез ҳал бўладиган жараён эмас. Бунинг учун унга ўйин амалиёти керак. У кўп ўйнамаган, асосан дубль таркибида майдонга тушган. Албатта, дублдаги даража бошқача — муҳит ҳам, босим ҳам асосий жамоадагидек эмас. Лекин унинг ҳозирги вазиятдаёқ майдонга тушаётгани ўзи учун яхши. У дарҳол, бошқалар кутганидек, юқори даражада ўйин кўрсата олмаслиги табиий. Бунинг учун унга вақт ва ўйин амалиёти керак», - дея Еличичнинг сўзларини келтиради Tribuna.uz мухбири.