Рўзиқул Бердиев: «Савияси баландроқ ўйинчиларни хоҳлагандик»

Суперлиганинг 16-тури якунида «Насаф» ўз уйида «Қўқон-1912» жамоасини қабул қилди. Ўйиндан олдин кўпчилик мезбонларнинг имкониятини юқори баҳолаганди. Бироқ учрашув 0:0 билан якунланди.

Ўйиндан қаршиликлар бош мураббийи Рўзиқул Бердиев матбуот анжуманида қуйидагиларни айтди:

- Ўйинда рақиб ҳимоясини ёриб ўтиш анча қийин бўлди. Ҳимояда зич ҳаракат қилди. Шунга қарамасдан биринчи бўлимдаги вазиятимизни голга айлантирганимизда албатта ўйин бошқача бўлиши мумкин эди. Рақиб жамоанинг бугунги ўйинини эътиборга олиш керак. Ҳақиқатда бизни ҳужумда вазият яратишимизга кам имконият берди. Менимча, Қўқон жамоаси бугун бир очко қўлга киритди.

- Иккала таймда икки хил ўйинни кўрдик. Танаффусгача жамоангиз жанговар ўйнади, танаффусдан кейин ўйин сустлашиб кетди. Яхши ўйнаётган Шалани алмаштирилиши...У охиригача ўйнаса бўлмасмиди?

- Фақат Шалада эмас, ўзи мен кутган эдим ва буни амалда ҳам кўрдик, бир таркибимиз кўп ўйинларни ўтказишгани учун бугунги учрашувда енгиллик йигитларимизда кўринмади. Баъзи футболчиларимизни ОКМК билан учрашувдан кейин тўлиқ тикланишга улгурмагани бугунги учрашувда ҳаракатимизда сусткашликлар борлигини кўрдик. Шала ҳам ўтган ўйинда катта ҳажмдаги ишни бажарганди. Қолаверса, рақиб кўпчилик бўлиб ҳимояланганида Шалани ўрнига бошқасини туширишга қарор қилдик, креативлик керак эди. Рақиб зич ҳимояланганида Шалада кам бўш ҳудудлар бўлади. Шунинг учун унда имкониятлар камроқ бўлади.

- Умар Эшмуродов таркибда кўринмаяпти.

- Енгил жароҳати бор эди. Даволаняпти, кейинги ўйинга тайёр бўлади.

- Ёзги трансфердан кўнглингиз тўляптими?

- Биз кўп нарсани режа қилгандик. Савияси баландроқ ўйинчиларни хоҳлагандик. Лекин биз бу футболчилар билан чекландик», - дея Бердиевнинг сўзларини келтиради Tribuna.uz журналисти.