Неймарнинг собиқ агенти: «Унинг «Реал»га ўтишини хоҳлаганман, аммо «Барса» ўйинчилари унга қўнғироқ қилиб жамоага таклиф қилаверишган»

Неймарнинг собиқ агенти Вагнер Рибейро бразилиялик футболчининг «Реал»га ўтиши учун фаол ҳаракат қилганини, «Барселона» томонидан эса музокараларни Андре Кюри олиб борганини айтди.

Унинг сўзларига кўра, Неймар 13 ёшдалигида Мадридда қарийб 20 кун бўлган. Кейинчалик «Реал» уни тўлиқ трансфер қилишга ҳам жуда яқин келган.

«Мен Неймарнинг «Реал»га ўтишини хоҳлагандим. Шу сабабли ҳамма билан курашдим.

Бир пайтлар Флорентино Перес билан барча масалалар келишиб олинганди, фақат «Сантос»нинг розилиги қолганди. «Реал» адвокатлари Бразилияда бўлиб, трансфер устида ишлашган.

Мен «Реал» билан музокаралар олиб бордим, «Барселона» билан эса Андре Кюри ишлади. Биз у билан мулоқот қилмадик.

«Барселона»нинг барча футболчилари Неймарга қўнғироқ қилиб, уни жамоага ўтишга таклиф қилишди. «Реал» футболчиларидан эса унга ҳеч ким қўнғироқ қилмади. Фақат Флорентино менга ва Неймарнинг отасига қўнғироқ қилди.

Биз тақдимот маросими учун Барселонага борганимизда, менга деярли бегона одамдек муносабатда бўлишди. Байрамда иштирок этмадим ва четда турдим.

Ҳатто футболдаги фаолиятимни тўхтатиш ҳақида ўйладим, чунки «Реал» ва Флорентино олдида мажбуриятларим бор эди. Қўлимдан келган барча ишни қилдим. Аммо якуний қарорни агент эмас, футболчининг ўзи қабул қилади. Неймар «Барселона»ни танлади, унинг отаси эса бу қарорни қўллаб-қувватлади.

Шунга қарамай, «Реал»нинг таклифи жиддий эди. Клуб исталган пулни тўлашга тайёр эди», — дея Рибейронинг сўзларини келтиради Globo Esporte.