Амалдаги чемпион – «Нефтчи» якка пешқадамлигини муносиб сақлаб келмоқда. Ушбу турда улар ўз майдонида «Қизилқум»ни 5:0 ҳисобида тор-мор келтирди. Ўйиндан сўнг фарғоналиклар бош мураббийи Ислом Исмоилов матбуот анжуманида иштирок этди.
- Биринчи навбатда барча мухлисларимизни чиройли ғалаба билан табриклаймиз. Ўйлайманки, стадионга келган мухлислар ўзлари истаган футболни кўришди ва чиройли голларга гувоҳ бўлишди. Ҳиссиётларга берилмасдан меҳнат қилишда давом этамиз. Ҳар бир учрашувда ғалабалар қозониш учун бор кучимиз билан ҳаракат қиламиз. Иккита дурангдан кейин ўзимизга келиб олишимиз керак эди. Футболчилар билан кўп гаплашдик. «Қизилқум»ни яхши ўрганиб чиқдик. Биринчи даврада ҳам бу жамоани йирик ҳисобда ютгандик. Ҳа, қаердадир рақиб ҳам етарлича қаршилик кўрсатди. Бироқ биз ўйлаган барча нарсалар майдонда амалга ошди.
- 10 август куни трансфер ойнаси ёпилади. Кўзланган режалар амалга ошдими?
- Максимал даражада таркибимизни кучайтириш учун ҳаракат қилдик. Бу бўйича ишлар олиб бориляпти, ҳали тўхтаб қолмаймиз. Ҳозирги кунда биз олишни истаган футболчиларни клублари билан шартномалари бор. Яхши савиядаги футболчиларни қўлга киритиш осон иш эмас. Қолаверса, сафимизда етарлича ижрочилар бор, биз уларга ишонамиз. Ўйлаймизки, қўл остимдаги футболчилар билан олдимизга қўйилган вазифаларни бажарамиз. Элит ОЧЛ учун таркибимизни кучайтириш ниятимиз бор. Бу бўйича ишлар олиб бориляпти. Худо хоҳласа, яхши янгиликлар бўлиши керак. Элит учун трансфер ойнаси очиқ бўлади. Оладиган футболчиларимизни фақат ОЧЛда ўйната оламиз. Бизда легионерлар лимити тўлган. Йован Жокични Ўзбекистон чемпионати рўйхатидан чиқардик. Ўрнига Кофини рўйхатдан ўтказдик.
- Одил Ҳамробеков ва Отабек Шукуровлар ҳақида гап-сўзлар юрибди. Шунга ойдинлик киртсангиз.
- Отабек Шукуров билан боғланганмиз. Лекин уни ҳали Ўзбекистон чемпионатига қайтиш нияти йўқ. Одил Ҳамробеков масаласи ҳозирча мавҳум. Уни ўзини клуби билан шартномаси бор. Шунинг учун бу қийин жараён.
- Ўйиндан тўлиқ қониқиш ҳосил қилдингизми?
- Ўйиндан келиб чиқиб таянч марказини кучайтиришни мақсад қилгандик. Ҳисобда олдинда бораётгандик. Шу билан бирга ҳимоя ва ҳужумдаги балансни ушлаш учун айнан Муҳсин Убайдуллаев қишда ҳам шу позицияда ўйнаган. Муҳсин универсал футболчи, исталган жойда ўйнай олади. Қачон ишонч билдирилса, тўлақонли ишончни оқлайди.
- Силванус Нимелини ортга қайтариш режаси йўқми?
- Йўқ, буни ўйлаб кўрмаганмиз.
- Сўнгги ўйинларда ҳимояда бироз хотиржамлик кузатилаётгандек. Бугун ҳам йирик ҳисоб бўлди. Аммо 2-3 та вазиятда рақиб ҳимояга ёриб кирди...
- Агар биз ҳужумкор ўйнашни, кўпроқ голлар уришни хоҳласак ҳимоямизда хавф бўлиши табиий ҳолат. Эътибор берсангиз, ҳужум қилаётганимизда жуда катта масофани ташлаб чиқамиз. Юқорига кўтариламиз. Ҳужум қилаётганимизда 4-5 нафар футболчимиз рақиб жарима майдонига киради. Ҳимоячиларимиз ҳам юқорига кўтарилади. Рақиб қарши ҳужумда ўйнаши табиий ҳолат. Бунга ечим қидиряпмиз. Қисман бугун рақибни узун паслар орқали ҳужумга чиқишини тўхтатдик. Истайсизми-йўқми, бу бўладиган ҳолат. Биз ё ҳимояда тўлиқ ўйнаб битта имкониятимиз бўлишини кутиб яшашишимиз керак ёки ҳужумкор ўйнайдиган бўлсак, бу нарсаларга кўникишимиз керак. Иккаласини бир хилда ушлашни иложи йўқ. Қаердадир дарвозабонимиз, қаердадир ҳимоячиларимиз ишончли ўйнаяпти. Статистикани қарасангиз, ўтган йили ҳимояга кўп эътибор қаратилган, аммо кўп гол ўтказган. Бу йил кўпроқ ҳужумга эътибор қаратяпмиз ва дарвозамиздан атиги 6 та гол ўтказдик. 40 та яқин гол уряпмиз, бу шунчаки дахшатли натижа. Юқорида ўйнаб туриб бунчалик кам гол ўтказиш катта меҳнат талаб қиладиган жараён.
Ўтган сафар ҳам айтгандим, масалан «Манчестер Сити»да Родри йўқ бўлиб қолганида жамоа роса қийналди. Жокич ҳам бизни жамоада мана шундай фигуралардан биттаси. Уни ўрнини тўлдириш ва ўйинимизни бошқа футболчиларга мослаштириш учун бизга учта ўйин керак бўлди. Учта учрашувда жуда қийналдик. Таянч ярим ҳимояси биз қураётган ўйин услубимизда асосий нуқталардан бири. Жокичга ўхшаган совуққон, ҳар қандай босим остида қарор қабул қиладиган, техник ва тактик жихатдан кучли футболчи керак бўлади. Афсуски, жароҳат олди ва жароҳатлар кўпаймоқда. Бугун Анвар Ғофуров ҳам жароҳат олди. Осон бўлмаяпти. Доим битта шаклланган жамоани икки-учта ўйинчиси сафдан чиқса, ўрнини тўлдириб, яна қайтадан жамоани йиғиб олиш – бу худди легони сачиб юбориб, қайтадан териш билан тенг нарса. Бундан буёғига жароҳатлар кам бўлишига умид қиламиз. Олдимизда мураккаб тақвим, қийин ўйинлар кутиб турибди. Барча футболчидан ҳимояда ҳам, ҳужумда ҳам фаол бўлишини талаб қиламан», - дея Исмоиловнинг сўзларини келтиради Tribuna.uz журналисти.
