Жозе Моуринио “Реал” Мадридда ўзининг дастлабки икки талабини амалга оширмоқда: трансфер сиёсатида сўзи ўтиши ва клубдаги иерархияга қатъий риоя қилиниши.
AS нашрининг ёзишича, португалиялик мутахассис қарор қабул қилишда бошқаларнинг фикрини эшитади, аммо якуний танловни ўзи амалга оширади.
Моуринио жамоага қайтиш арафасидаёқ клуб раҳбариятидан трансфер сиёсатида фаол иштирок этиш имкониятини сўраган эди. Май ойи охирида у раҳбариятга жамоага керак бўлган футболчилар профили акс этган техник ҳисобот ҳам тақдим этган. Унда аниқ номлар эмас, балки ҳар бир позиция учун қандай хусусиятларга эга футболчилар зарурлиги кўрсатилган.
Трансферлар масаласида мураббийнинг таъсири аллақачон сезилмоқда. Родри билан боғлиқ режалар амалга ошмагани “Реал” учун жиддий йўқотиш бўлган бўлса-да, Моуринио клубнинг ҳаракатларини қўллаб-қувватлаган. Винисиус Жуниорнинг жамоада қолиши ва Тиаго Питарчнинг таркибда сақлаб қолиниши каби масалаларда ҳам унинг фикри инобатга олинган.
Португалиялик мураббий академия тарбияланувчилари билан ишлашда ҳам қарорларни шахсан қабул қилмоқда. “Моуринио нима дейди?” деган савол “Реал” ёш футболчилари орасида тез-тез янграётгани айтилмоқда. У машғулотларга чақириладиган футболчиларни ҳам умумий эҳтиёждан келиб чиқиб эмас, шахсан ўрганиб, танламоқда.
Моуринионинг таъсири машғулот жараёнида ҳам яққол кўринади. Жамоада жисмоний тайёргарликка катта эътибор қаратилмоқда, икки маҳаллик машғулотлар одатий ҳолга айланган. Жисмоний тайёргарлик бўйича мутахассислар Антонио Пинтус ва Моуринио билан бирга келган Антонио Диас футболчиларнинг юкламаларини назорат қилмоқда.
Бундан ташқари, мураббий овқатланиш, жароҳатлардан тикланиш, машғулотларга ўз вақтида келиш ва жамоавий овқатланиш каби кундалик жараёнларга ҳам янги тартиб жорий этган. Бу каби ишларни мураббийлар штаби юргизади, аммо якуний назоратни ўз қўлида сақлаб қолмоқда.
Мухлислар бу янгиликни Telegram’да муҳокама қилмоқда
Изоҳлар Telegram’да очилади