Наманганда бўлиб ўтган «Навбаҳор» - «Бунёдкор» (4:3) ўртасидаги учрашувдан кейин ўтказилган матбуот анжуманида меҳмонлар бош мураббийи Илёс Зейтуллаев қатнашди.
- Аввало, Наманган шаҳри мухлисларига шундай футбол муҳитини яратиб берганлари учун раҳмат айтмоқчиман. Чунки бундай стадионда, бундай муҳитда ўйнаш ҳақиқатан ҳам жуда ёқимли. Бизники бўлган, узоқдан келиб бу ўйинни кўриш учун ташриф буюрган мухлисларга ҳам раҳмат айтмоқчиман. Менимча, бугунги ўйин чиройли ва томошабоп бўлди.
Биз жамоа сифатида, инсон сифатида, профессионаллар сифатида ўзимизга боғлиқ бўлган барча ишни қилишга ҳаракат қилдик. Лекин бизга боғлиқ бўлмаган, таъсир ўтказа олмайдиган жиҳатлар ҳам бор. Албатта, бундай масалалар менинг ваколатим доирасига кирмайди. Агар эсласангиз, тахминан икки йил аввал ҳам «Навбаҳор»га қарши шу ерда 2:1 ҳисобида ғалаба қозонган эдик. Қизиқ ўйин бўлган, ўшанда 12 дақиқа қўшимча вақт берилган ва учрашувнинг сўнгги дақиқаларида пенальти белгиланган эди. Ўтган йили ҳам худди шундай ҳолат бизнинг стадионимизда содир бўлган: гол урилган, афсуски, у бекор қилинган эди.
Шунинг учун бугун ҳам, менимча, жуда кучли рақибга қарши муносиб ўйнадик. Рақибни тажрибали ва кучли мураббий — Кападзе бошқармоқда. У жуда яхши жамоа шакллантирган. Шунинг учун йигитлар билан, уларни бугун кўрсатган ўйиндан фахрланаман. Албатта, эртага нима бўлишини билмайман. Чунки, ўзингиз ҳам тушуниб турганингиздек, мен ҳозир шундай вазиятдаман.
- Ростини айтсам, ёшларнинг кўзидаги иштиёқни кўриб, ҳайрон қолдик. Клубингиз оғир кунларни бошидан кечиряпти. Шундай бўлса-да, жамоа ҳар бир ўйинда ёрқин футбол кўрсатяпти, бугун эса янада ёрқинроқ ўйин намойиш этди. Шундай шароитда жамоани ўйинга қандай тайёрлаяпсиз?
- Аввало, буни сезаётганингиз учун раҳмат. Бизнинг оғир вазиятимизни тушунаётганингиз учун ҳам раҳмат. Нима дейишим мумкин? Мен уларни одатий маънода руҳлантирмаяпман. Чунки бу ерда энди гап оддий мотивация ҳақида эмас. Мотивация — ташқи таъсир. Масалан, сиз футболчига мукофот пули, каттароқ маош берасиз — бу ташқи мотивация. Бу йигитлар эса руҳланган. Руҳланиш — инсоннинг ичидан келадиган туйғу. Шунинг учун биз улар билан тез-тез суҳбатлашамиз, вазият жуда оғир эканини тушунтирамиз. Лекин менимча, бу меҳнат...Балки YouTube’да биз ҳақимизда гапирадиган, устимиздан куладиган одамлар ҳам бордир. «Булар бу ерга келади, 4:0, 5:0 ҳисобида ютқазиб кетади», деб биз устимиздан кулишлари мумкин.
Менимча, йигитлар бунинг барчасини кўриб туришибди. Бу уларнинг ориятига тегади. Ахир, улар футболчи, бўлажак профессионаллар. Менимча, бу йигитлар — Ўзбекистон футболи келажаги. Ўйиндан кейин футболчиларимдан бирининг кўз ёшларини кўрдим. У йиғлаб: «Зейтулаевич, биз ҳаракат қилдик, лекин бизга боғлиқ бўлмаган нарсалар ҳам бор», деди.
Мен унга: «Сен ҳаракат қилдинг, ўз ишингни қил. Худо ҳаммасини кўриб турибди, бизнинг барча қурбонликларимизни билади. Шунинг учун вақти келади, биз ҳам ҳаётда, ҳам фаолиятимизда ўз меҳнатимиз самарасини кўрамиз. Сен ҳаракат қилишинг, курашишда давом этишинг керак», дедим. Бу ёш футболчилар — Ўзбекистоннинг келажаги. Шунинг учун агар улар шундай даражада ўйнашда давом этишса, уларнинг келажаги жуда яхши бўлади.
- Бугун жуда чиройли, агрессив футбол намойиш этдингиз. Меҳнатларингиз учун раҳмат. Футболчилар таркибида ва умуман жамоада кейинчалик қандайдир ўзгаришлар бўладими?
- Бу менга боғлиқ эмас. Эртага нима бўлишини билмайман. Аслида, бу ҳақда жуда кўп гапиряпман. Бизнинг йигитларимиз олти ойдан бери пул ишлашмаяпти, яъни маош олишмаяпти. Бу ҳақда энди гапиришни ҳам хоҳламайман. Чунки доим шу масала ҳақида гапираётгандек таассурот пайдо бўляпти. Ҳамма ҳаммасини билади, ҳамма ҳаммасини кўриб турибди. Хоҳлашса — ёрдам беришади. Хоҳлашмаса... Билмадим, бу ҳатто кимга боғлиқлигини ҳам билмайман. Шунинг учун вазият тушунарли.
Менинг ҳам оиласи бор инсонларим бор. Жамоада хорижлик мутахассислар ҳам ишлаяпти. Билмайман, улар яна қанча вақт шундай шароитда бизга ёрдам беришлари мумкин — фақат орият ва профессионаллик юзасидан. Билмайман, бу ҳолат яна қанча давом этиши мумкин. Мен фақат уларнинг бир куни ҳаммасини ташлаб, кетиб қолишидан қўрқаман. Мен буни бошидан охиригача очиқ айтаяпман. Бугун майдонга асосий таркибда чиққан ва захирадан ўйинга қўшилган ёш футболчиларни ҳам табрикламоқчиман. Улар бугун ўзларининг Суперлигада ўйнай олишларини кўрсатишди. Шунинг учун улар билан ишлашда давом этамиз, қўлимиздан келганича ҳаракат қиламиз. «Навбаҳор»ни ғалаба билан табриклайман», - дея сўзларини келтиради Tribuna.uz мухбири.
