Френки де Йонг “Барселона”даги келажаги, жароҳати, Ҳанси Флик билан муносабати ва клубга бўлган садоқати ҳақида тарқалаётган хабарларга кескин муносабат билдирди. Нидерландиялик яримҳимоячи клубнинг расмий медиа каналларига берган интервюсида унинг имижига зарар етказаётган ёлғон маълумотларга ойдинлик киритишга қарор қилганини айтди. Бу ҳақда “Marca” нашри хабар бермоқда.
Де Йонгнинг таъкидлашича, сўнгги тиббий текширув жароҳати аввал тахмин қилинганидан жиддийроқ эканини кўрсатган. Унинг айтишича, АҚШдаги машғулот вақтида рақиб футболчи унинг устига тушиб кетган ва тиззасида муаммо пайдо бўлган. Дастлабки текширувдан кейин унга оғриқ билан бўлса ҳам ўйнашда давом этиши мумкинлиги, жароҳат эса оғирлашмаслиги айтилган.
“Футбол ўйнашни жуда яхши кўраман. Айниқса, “Барселона” ва терма жамоа учун ўйнашни. Жаҳон чемпионати эса орзу. Шунинг учун имконим борича майдонга тушишга ҳаракат қилдим”, — деди футболчи.
Бироқ кейинги текширувда жароҳат жиддийлашгани маълум бўлган. Де Йонг бу хабарни қабул қилиш унга оғир бўлганини айтди. Ҳозир футболчи тикланиш жараёни учун клуб билан биргаликда махсус режа ишлаб чиққанини таъкидлади.
Шу билан бирга, нидерландиялик футболчи унинг профессионаллиги ва клубга муносабати ҳақида тарқалаётган хабарлардан норози. Унинг айтишича, айрим журналистлар ёлғон маълумотларни тарқатиб, унинг жамоатчилик олдидаги имижига салбий таъсир кўрсатмоқда.
“Жуда кўп ёлғон хабарлар чиқяпти. Бу менинг имижимга зарар етказаётганини ва айрим одамларнинг мен ҳақимдаги фикрига таъсир қилаётганини сезяпман”, — деди Де Йонг.
Футболчи Ханси Флик билан муносабати ёмонлашгани ҳақидаги хабарларни ҳам рад этди. Де Йонг бош мураббий билан муносабати яхши эканини, улар мунтазам суҳбатлашиб туришини айтди. Шунингдек, унинг клуб раҳбарияти билан ҳам муаммоси йўқлигини таъкидлади.
“Флик билан муносабатим ёмон экани мутлақо ёлғон. Клуб билан муносабатим ёмонлиги ҳақидаги гаплар ҳам ҳақиқат эмас. Раҳбарият ва клубдаги бошқа одамлар билан кўп гаплашаман”, — деди у.
Де Йонг ўтган мавсумда Чемпионлар лигасида “Атлетико”га қарши ўйнашдан бош тортгани ҳақидаги хабарни ҳам кескин рад этди. “Бу ёлғон. Бу, шунчаки, ҳақиқатдан йироқ”, — деди футболчи.
32 ёшли ярим ҳимоячи “Барселона”да қолиш нияти борлигини ҳам яна бир бор билдирди. У клубда етти йилдан бери ўйнаётганини ва ҳали амалга ошириши керак бўлган орзулари кўплигини айтди. Де Йонг жамоанинг янги мавсумдаги асосий мақсадларидан бири Чемпионлар лигасида ғолиб чиқиш эканини таъкидлади.
Футболчи мухлисларни ҳам қийин вазиятда жамоани қўллаб-қувватлашга чақирди. Унинг фикрича, жароҳат сабаб ҳозир оғир даврни бошдан кечираётган бўлса-да, “кулес”ларнинг қўллаб-қувватлаши унга куч бермоқда. Де Йонг янги трансферлардан ҳам мамнун эканини айтиб, уларнинг жамоага мослашишига ёрдам бераётганини қўшимча қилди.
