Ферран Торрес сотилди, Родри трансфери ҳали ноаниқ

Ҳозир футболчилар учун жомадонларни йиғиш, сафарга тайёрланиш ва телефонга тикилиб ўтириш вақти. Родри ва Ферран Торрес бугунги кунни айнан шундай ўтказмоқда. Мадридлик ярим ҳимоячи ҳали “Барселона”га трансфери бўйича келишувга эришилмагани сабабли жума куни Манчестерга бориб, “Манчестер Сити” машғулотларига қўшилиши керак.

Ферран Торрес масаласида эса вазият анча аниқ: “Барселона” ва “ПСЖ” принципиал келишувга эришди ва клублар ҳозир ҳужжатларни ўзаро алмашмоқда. Валенсиялик ҳужумчининг Париж клубига трансфери расман эълон қилиниши энди вақт масаласи. Трансфер қиймати тахминан 50 млн еврони ташкил этади. Бу “ПСЖ” бир неча кун олдин тақдим этган дастлабки таклифдан 10 млн еврога кўп.

“Барселона” 26 ёшли футболчининг трансферини бир неча кун олдиноқ ҳал қилиб қўйганди. Ферраннинг каталонияликлар билан шартномаси тугашига яна бир мавсум қолган эди. Режага кўра, у ҳатто пайшанба куни Францияга йўл олиши керак эди. Аммо бугун кечгача клубдан расмий хабар олмагани учун сафарни бироз кечиктирди. Шунга қарамай, вазият назоратда эди. Музокаралар амалда якунланган: “ПСЖ” Жаҳон чемпионатида ўзини кўрсатган ва айни пайтда бозорда энг юқори баҳоланаётган ҳужумчилардан бири бўлган Ферран Торрес учун қарийб 50 млн евро тўлайди.

Родри бўйича музокаралар секин кечмоқда

Родри бўйича музокаралар эса ҳали бу қадар илгариламаган. Шу сабабли 30 ёшли Испания терма жамоаси яримҳимоячиси жума куни Манчестерда бўлиши керак. 14 август унинг Мареска қўл остидаги машғулотларга қўшилиши белгиланган кун ва футболчи клуб олдидаги мажбуриятини бажаради.

“Барселона” трансфер амалга ошишига ишонч билдирмоқда. Аммо келишув каталониялик раҳбарлар кутганидан кўпроқ вақт олмоқда. Асосий тўсиқ — молиявий масала. Бироқ “Барселона” раҳбариятидаги ҳеч ким бу фарқни бартараф этиб бўлмайдиган даражада деб ҳисобламаяпти.

Шунга қарамай, “Атлетико”нинг собиқ футболчиси учун трансфер дастлаб режалаштирилганидан анча қимматга тушиши мумкин.

“The Times” маълумотига кўра, “Манчестер Сити” Родри учун 65–70 млн евро миқдорида кафолатланган тўлов талаб қилмоқда. “Барселона” эса сўнгги таклифида бонусларни ҳам қўшган ҳолда 65 млн еврога чиққан.

Родрининг “Сити” билан шартномаси 2027 йил июнига қадар амал қилади. Аммо АПЛ клуби футболчи “Барселона”га ўтишга розилигини берганини яхши билади. Каталония клуби ҳам ҳозир ортга чекина олмайди. Қолаверса, “Барселона” Энцо Фернандесни ҳам таркибига қўшиш учун маблағ топиши керак. “Челси” эса футболчиси учун таклифни жума куни тушдан кейингача кутишга тайёр.

Шу тариқа, ҳар икки футболчининг ҳам жомадони тайёр. Аммо уларнинг вазияти мутлақо бошқача. Родри Манчестерга бориши ва “Сити” олдидаги мажбуриятларини бажариши шарт. Аммо испаниялик футболчи яқин орада яна жомадонини йиғишига ишонмоқда. Бу сафар йўналиш Барселона бўлади. “Барселона” унга буни кафолатлаган.