«Бобур арена»да бўлиб ўтган «Андижон» - «Нефтчи» (0:3) ўртасидаги водий дербисидан кейин ташкил қилинган матбуот анжуманида дастлаб меҳмонлар устози Ислом Исмоилов қатнашди.
- Биринчи навбатда ажойиб ғалаба билан мухлисларимизни табриклайман. Стадионда ажойиб атмосфера ҳосил қилишди. Худди уйда ўйнагандек бўлдик. Ўйин оғир ўтиши аниқ эди. Сабаби, водий дербиси ва иккала жамоа ҳам ҳужумкор футбол ўйнайди. Шунга қарамасдан ғалаба қозондик. Лобановскийни гапи бор: натижа қолади, ўйин унутилади. Баъзи пайтларда сифатсиз ёки яхши ўйнамасдан ҳам натижа муҳим ҳисобланади. Ўйиндан олдин футболчиларизга берган кўрсатмамизда кўпроқ ўйин интизомига эътибор қаратдик. Бунга сабаб бўладиган жуда кўп омиллар бор эди. Учрашувни юқори интенсивликда бошлай олмасдик. Шунинг учун интизом муҳимлигини тушуниб турдик. Биринчи таймда «Андижон» жамоаси ташаббусга эга бўлган бўлиши мумкин. Биз уларга ўйнаш учун имконият бердик. Бу олдиндан ишлаб чиқилган режага асосан эди. Иккинчи таймда озгина темпни кўтардик ва ўз ўйинимизни ўйнашни бошладик. Рақибни хатолар қилишга мажбур қилдик. Ҳимоядан пас билан чиқиб кетишга ҳаракат қилдик. Майдон сифати бунга йўл қўймасди ва кўпроқ узун пасларга ўтдик. Қисқа пасларимизни рақиб жарима майдони атрофида қилишга ҳаракат қилдик. Ҳавода тўп учун курашларда кўпроқ иккинчи тўпларни ютқазиб қўйдик. Биринчи таймда бу нарса яққол кўзга ташланди. Танаффусдан кейин ўзимизни прессинг услубимизга қайтишга қарор қилдик. Шу билан рақибни кўп хато қилишга мажбур қилдик. Умуман олганда, «Андижон» жамоаси ҳам яхши ўйин кўрсатди. Яхши мураббий ишлаяпти. Ўйлайманки, бу мураббий билан «Андижон» жамоаси ҳали кўплаб ютуқларга эришади.
- Усмонали Исмоналиевнинг қизил карточка олиши ўйин натижасига таъсир қилди, деб ўйлайсизми?
- Бу футбол, ҳар нарса бўлиши мумкин эди. Балки рақиб 11 футболчи билан ўйнаганда ҳам балки ўз голимизни уришимиз мумкин эди. Ўша ҳолатгача бўлган вазиятни оладиган бўлсак, иккинчи таймни ҳужумкорлик билан бошладик ва рақибни айнан шу ҳолатда хато қилишга мажбур қилдик. Ўша вазиятга яқин тургандим. Рақиб атайин қўпол ўйнамаганди, аммо бу қоида ва у ҳамма учун бир хил. Қонун қоида бўйича бу 100 фоиз қизил карточка эди. Балки бу ҳам таъсир қилган бўлиши мумкин. Лекин биз йигитларга ишонардик ва ишлаб чиқилган режамиз ҳам бор эди. Барибир биринчи таймга нисбатан иккинчи таймда ўйинимизни кучайтирмоқчи эдик.
- Бунгача асосан ҳимоячи сифатида ўйнаган Муҳсин Убайдуллаев бугун ярим ҳимояда ўйнади. Бу тактикангизмиди?
- Ҳа, бу жароҳатлар билан боғлиқ. Жароҳатлар кўпайиб кетди. Йован Жокич, Аброр Исмоилов, Анвар Ғофуров, бугун мана Ратиньо жароҳат олди. Бунақа ҳолатда жамоа кейинги ўйинларга қандай тайёргарлик кўради? Асосий етакчи футболчиларимиз битта-битта сафдан чиқишяпти. Бизда бошқа имконият йўқ эди, Икром Алибоевни нима учун захирада қолдиргандик? Чунки унда сариқ карточкалар сони учта эди. «Бухоро» билан учрашувни ҳисобга олган ҳолда уни захирада ушлаб тургандик. Афсуски, у ҳам бугун тўртинчи сариқ карточкасини олди ва яна бир ўйинчимиз сафдан чиқди. Муҳсин бу позицияда ўйнаган. Бунга ўтган учрашувда тайёргарлик кўришни бошлагандик. «Қизилқум»га қарши охирги 20 дақиқаликда айнан «Андижон» учун тайёргарлик сифатида ўзгаришларни қилганмиз ва ўша ҳолатда Муҳсин ўзини оқлаган.
- Ёш футболчи Абдуғаниевни ўйини ҳақида фикрингиз?
- Инсонни қувонтиради. Бунинг устига биринчи ўринда кетаётган «Нефтчи»дек жамоада бундай футболчининг ўйнаши ўзи учун катта ютуқ. Мураббий сифатида биз ҳам катта таваккалчиликка қўл уряпмиз. Бизда бошқа имкон ҳам йўқ. Ҳозирга қадар берилган ишончни тўлиқ оқлаяпти. Ишлашдан тўхтамаса, у ҳам Ҳусанов даражасидаги юқори савиядаги ҳимоячи бўлади. 18 ёшида Суперлигада ишончли ўйнаяпти. Унгача 3-4 та учрашув ўтказган бўлса, бирорта хато қилмаган.
- Ёзги селекцияда «Андижон» «Нефтчи» футболчилари – Иззатилло Пўлатов ва Асилбек Жумаевга қизиққан экан. Уларни маҳоратини янада ошириш мақсадида «Андижон»га берса бўлмасмиди?
- Пўлатовни бермоқчи бўлдик, кейинчалик «Андижон» буни хоҳламади. Асилбек Жумаевга келсак, бизда Аброр Исмоилов жароҳат олгандан кейин иложи йўқ бу позицияга ўйинчи ушлаб туришимиз керак эди.
- Ўзингиз айтганингиздек, бир қатор ўйинчилар жароҳат олиб сафдан чиқяпти. ОЧЛ Элит мусобақасида бундай йўқотишлар билан қандай иштирок этмоқчисизлар?
- Ҳайронман. Бу бўйича мураббийлар штаби билан яна маслаҳат қиламиз. Ҳозир бир нима дейиш қийин. Ҳар бир учрашув оғир ўтяпти. Бундай йўқотишларга учрайверсак, иложи йўқ, ёшларга ҳам кўпроқ имконият берамиз. Лекин вазиятдан чиқиб кетишга ҳаракат қиляпмиз. Ёзги танаффусдан кейин ўйинлар янада қийин ўтяпти. Қаердадир очко, қаердадир футболчиларни йўқотяпмиз. Умид қиламанки, бу вазиятдан чиқиб кетамиз. Насиб қилса, ОЧЛ Элит мусобақасигача барча ўйинчилар тўлиқ сафга қайтишади.
