LaLiga’нинг 96-мавсуми бошланиш арафасида. «Барселона» ўтган мавсумда таркибида Килиан Мбаппе ва Винисиус бўлган «Реал»ни ортда қолдириб, қўлга киритган чемпионликни ҳимоя қилишга ҳаракат қилади. «Қироллик клуби» эса эски таниш — Жозе Моуринио билан янги даврни бошламоқда. Диего Симеоне бошчилигидаги «Атлетико» ҳам таркибини жиддий янгилаб, яна барча совринлар учун курашишни мақсад қилган. Трансфер бозори фаол ўтди, чемпионат эса истеъдодли футболчиларни қайтариб, дунёдаги энг кучли лига мақоми учун яна жиддий даъвогарга айланди, деб ёзмоқда AS.
Жаҳон чемпионатидаги натижа ҳам LaLiga нуфузини оширди. Испания терма жамоасининг муваффақиятини сўнгги йилларда Премиер-лиганинг молиявий имкониятлари соясида қолган чемпионатдан айри ҳолда тасаввур қилиб бўлмайди. Родри ва Ферран Торрес билан боғлиқ вазиятни ҳисобга олмаганда, 18 нафар жаҳон чемпиони Испания чемпионатида тўп тепади. Бу LaLiga’нинг ҳолати яхши эканини ва испан клублари ўз академияларида етиштирилган футболчиларга ишонишда давом этаётганини кўрсатади. Балки иқтисодий пасайиш ва қатъий маош лимитлари клубларни шунга мажбур қилгандир, аммо ҳар бир ёмонликда бир яхшилик бор.
Рақамлар ҳам бу фикрни тасдиқлайди. Европанинг кучли беш чемпионати орасида LaLiga хорижлик футболчилар улуши энг кам бўлган лига ҳисобланади — уларнинг салмоғи атиги 39 фоиз. АПЛда эса бу кўрсаткич 69 фоизга етади. Испания чемпионатида клуб академияларидан чиққан футболчилар сони ҳам юқори. «Реал», «Барселона», «Реал Сосиедад», «Валенсия», «Атлетик», «Виллярреал», «Селта» ва «Атлетико» каби клублар Европанинг йирик чемпионатлари орасида академия тарбияланувчиларига энг кўп имконият берадиган жамоалар қаторида.
Энди LaLiga ўз нуфузини янада мустаҳкамлашга интилади. «Реал» ва «Барселона» трансфер бозорида жиддий ҳаракат қилди. Мадрид клубининг сарф-харажати 200 млн евродан анча ошди. Жамоага Диоманде («Лейпциг»), Кукуреля («Челси»), Эспи («Леванте»), Дюмфрис («Интер»), Конате («Ливерпул») ва Бернарду Силва («Манчестер Сити») қўшилди. Аммо асосий қизиқиш, шубҳасиз, Моуринионинг «Реал» билан нималарга эриша олишида.
Унинг вазифаси Ҳанси Флик бошчилигидаги «Барселона»нинг сўнгги йиллардаги устунлигига барҳам беришдан иборат бўлади. Каталония клубининг уйғонишида немис мутахассиси муҳим рол ўйнади. Ламин Ямал эса жамоанинг асосий юлдузи бўлиб қолади. Родрининг эҳтимолий трансфери эса Энтони Гордон («Нюкасл») ва Карим Адейеми («Боруссия» Дортмунд) билан бир қаторда «Барселона»нинг услубини тасдиқловчи ва «Сантяго Бернабеу»га йўлланган жиддий сигнал бўлиши мумкин. Асосий савол — «Spotify Камп Ноу»даги иштиёқ ва етакчилик сақланиб қоладими?
«Атлетико» эса одатдагидек чемпионатнинг учинчи асосий даъвогари. Энди жамоада Антуан Гризманн йўқ, аммо Грималдо, Ҳюлманд, Ли Кан Ин ва бошқа янги футболчилар келмоқда. Ҳозирча Хулиан Алварес ҳам жамоада. Аргентиналик ҳужумчининг келажаги борасидаги сериал эса ҳали якунланмаган. Клуб ва Симеоненинг уни сақлаб қолиш истаги аниқ, аммо бу унинг «Атлетико»даги сўнгги мавсуми бўлиши ҳам мумкин.
LaLiga’нинг яна бир ўзига хос жиҳати — лойиҳалардаги барқарорлик. Янги мавсум олдидан фақат олти клуб бош мураббийини алмаштирди: Моурино («Реал»), Иниго Перес («Виллярреал»), Терзич («Атлетик»), Бенят Сан-Хосе («Райо»), Рамис («Осасуна») ва Анселми («Элче»).
«Виллярреал»нинг Марселиносиз қандай ўйнаши қизиқ бўлади. Иниго Пересга ишонч катта, аммо у ўзидан олдинги мураббий қолдирган катта меросни давом эттириши керак. «Атлетик»да Терзичнинг пайдо бўлиши ҳам қизиқ. «Реал Сосиедад» ва «Селта»да эса Оярсабал ва Борха Иглесиас иштирокидаги лойиҳалар деярли ўзгармади. Бунинг ўзи ижобий ҳолат.
«Бетис»да ҳам жиддий ўзгаришлар кузатилмади. Мануэл Пеллегрини қолди, мухлислар эса Иско жароҳатидан тўлиқ тикланишини интиқлик билан кутмоқда. «Хетафе» ҳам Европа мусобақаларида иштирок этади. Хосе Бордалас эса клубда қолиб, яна бир мўъжиза яратишга ҳаракат қилади. Аммо жамоа Уче хизматларидан маҳрум бўлди — унинг оғир жароҳати ёзги мавсумнинг энг ёмон хабарларидан бири бўлди.
Бу LaLiga’нинг яна бир муҳим хусусиятини кўрсатади: жамоалар ўртасидаги кучлар нисбати жуда яқин. Ўтган мавсумдаги тушиб кетиш учун деярли тенг кураш буни яққол намоён қилди. Испания футболи тарихидаги икки йирик клуб — «Севиля» ва «Валенсия» ҳам бу курашнинг ичида қолди. Энди улар қийин даврдан чиқиб, ўзларининг ғолиблик анъаналарини қайта тиклаши керак.
Янги мавсумда рақобат янада кучайиши мумкин. Чунки юқори лигага «Расинг», «Малага» ва «Депортиво» қайтди. Тарихи ва мухлислар базаси билан бу клубларнинг LaLiga’да яна пайдо бўлиши Испания футболи учун қувонарли воқеа. «Расинг» ва «Малага» ҳужумкор ўйини билан сюрприз қилиши мумкин. «Депортиво» эса пухта иш ва молиявий қўллаб-қувватлови билан яхши истиқболга эга.
Трансфер дарчаси ёпилишига икки ҳафтадан кўпроқ вақт қолган бир пайтда ҳам барча клубларда ҳал қилиниши керак бўлган масалалар бор. LaLiga раҳбарияти мавсум давомидаги трансфер харажатлари 800 млн евродан ошишини кутмоқда. Бу сўнгги беш йилга нисбатан сезиларли ўсишдир.
Албатта, бу рақам АПЛнинг йиллик сарф-харажатлари билан таққосланганда анча кичик. Аммо сўнгги ўн йилда Европа мусобақаларида қўлга киритилган совринлар бўйича фарқ катта эмас: инглиз клублари 11 та, испан жамоалари эса 10 та соврин олган.
Ушбу устунликни Испания терма жамоасининг муваффақиятлари янада камайтиради. 2024 йилги Европа чемпионати ва Жаҳон чемпионатидаги ғалаба кучлар нисбатини испанлар фойдасига ўзгартирди. Бу — чемпионлар LaLiga’си.
Мухлислар бу янгиликни Telegram’да муҳокама қилмоқда
Изоҳлар Telegram’да очилади