“Реал” 2026/27 йилги мавсум учун учинчи либосини тақдим этди. Мадрид клуби ва “Аdidas” ҳамкорлигида яратилган янги тўплам ёрқин пушти ранги билан ажралиб туради. Клуб таъкидлашича, ушбу ранг дунёнинг турли бурчакларидаги “Реал” мухлисларини бирлаштирувчи умумий иштиёқ ва жамоанинг глобал миқёсини ифодалайди.
Янги либос дизайни Лотин Америкаси ҳунармандчилигида қўлланиладиган геометрик нақшлардан илҳомланган. V-симон ёқа, енг учлари, “Adidas” логотипи, клуб эмблемаси ва уч чизиқли деталлар кремранг тусда ишланган. Шу тариқа, анъанавий маданий элементлар замонавий спорт дизайни билан уйғунлаштирилган.
Либос профессионал футболчилар учун махсус ишлаб чиқилган енгил матодан тайёрланган. “Adidas”нинг climacool+ технологияси танадан намликни тез чиқариб, футболчиларга юқори жисмоний юклама пайтида салқинликни сақлашга ёрдам беради.
“Реал” янги мавсум учун асосий ва сафар либосларини ҳам аввалроқ намойиш қилган эди. Асосий тўплам клубнинг анъанавий оқ рангини сақлаб қолган бўлиб, унинг дизайни “Реал”нинг энг муҳим белгиси сифатида элегантлик ғоясига қурилган.
Сафар либоси эса тўқ яшил рангда тайёрланган ва оқ деталлар билан бойитилган. Унда клубнинг инициалларидан илҳомланган нозик геометрик нақш, замонавий ёқа ҳамда уч япроқли “Adidas” логотипи қўлланган. Дарвозабонлар учун эса ёрқин мовий рангдаги алоҳида тўплам ишлаб чиқилган.
Шу тариқа, “Реал” 2026/27 йилги мавсум учун учта асосий либос вариантини тўлиқ тақдим этди. Янги пушти тўплам эса клубнинг сўнгги йиллардаги анъанавий оқ ва сафардаги тўқ яшил либосларидан кескин фарқ қилиб, жамоанинг глобал аудиториясига урғу беради.
