“Барселона” 2026/27 йилги мавсум учун Nike бренди томонидан тайёрланган учинчи либосини тақдим этди. Янги тўплам ферузаранг ва мовий тусларга асосланган бўлиб, клубда футболчи бўлишдан олдин унинг мухлиси бўлган инсонлар ҳақидаги ғоядан илҳомланган.
Каталония клуби янги либос концепциясини “Барса”да ўйнаш орзуси билан боғлаган. Клуб таъкидлашича, бугун жамоа сафида майдонга тушаётган футболчиларнинг аксарияти бир вақтлар трибуналарда турган оддий мухлислар бўлган.
“Футболчи бўлишларидан олдин улар кулес эдилар. Трибуналарда, мактаб майдончаларида ёки “блауграна” оиласининг бир қисми бўлишни орзу қилиш мумкин бўлган ҳар қандай жойда улар клуб рамзини майдонда намойиш этишдан анча олдин бу рангларни фахр билан кийишган”, — дейилади “Барселона” баёнотида.
Каталонияликлар шу тариқа учинчи либос орқали клубнинг мухлислар билан боғлиқ тарихини намойиш этишни мақсад қилган. Унда “Барса” мухлиси бўлиб ўсган ва кейинчалик жамоа футболчисига айланган инсонлардан кейинги авлодга илҳом бериш ғояси асосий ўринни эгаллаган.
Янги мавсум учун “Барселона”нинг сафар либоси ҳам аввалроқ тақдим этилган эди. Nike ва Коби Брайант бренди билан ҳамкорликда яратилган ушбу либос асосан қора рангда бўлиб, пастки қисми аста-секин бинафша тусга ўтади. Олтин рангли деталлар катта мақсадлар ва совринларга интилишни ифодалайди.
Сафар либосининг яна бир ўзига хос жиҳати — Коби Брайантнинг машҳур ибораси ёқа ичига яширин тарзда жойлаштирилгани. Унда “Ўйинни уни топганингдан яхшироқ ҳолда қолдир”, деган иқтибос келтирилган.
“Барселона”нинг асосий либоси эса анъанавий кўк ва тўқ қизил ранглардаги градиент чизиқлар билан ишланган. Унда клуб учун махсус ишлаб чиқилган FC Barcelona Modernista шрифти ҳам қўлланилади. Ушбу шрифт Каталония модерни ва Барселона шаҳрининг маданий мероси билан клубнинг визуал қиёфасини боғлаш мақсадида яратилган.
Янги шрифт эркаклар ва аёллар биринчи жамоалари либосларида футболчиларнинг фамилияси ҳамда рақамлари учун ишлатилади. У Чемпионлар лигаси, Испания Кубоги ва Суперкубок баҳсларида қўлланади, Ла Лига ўйинларида эса чемпионатнинг расмий шрифти сақланиб қолади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади