Хулиан Алварес ва «Атлетико» ўз позицияларидан қайтмаяпти

Хулиан Алварес ва «Атлетико» футболчининг келажаги борасида ўз позицияларини ўзгартирмаяпти. Испаниянинг «AS» нашрининг ёзишича, аргентиналик ҳужумчининг атрофидагилар унинг клубдан кетиш истаги сақланиб қолаётганини билдирган, мадридликлар эса футболчини сотиш нияти йўқлигини яна бир бор кўрсатмоқда.

Айни пайтда аниқ бўлган ягона ҳолат — Алварес жамоа ихтиёрига қайтиб, Махадаондаги клуб базасида машғулот ўтказди. 26 ёшли ҳужумчи жамоа жисмоний тайёргарлик мураббийи Луис Пиниэдо билан ишлади. У учун алоҳида тикланиш ва тайёргарлик дастури ишлаб чиқилган бўлиб, футболчи шу режа асосида бугун яна бир машғулот ўтказиши кутилмоқда.

Алвареснинг машғулотда жиддий кайфиятда бўлгани айтилмоқда. Унинг асосий вазифаси — мавсумолди тайёргарликни босқичма-босқич бошлаш. Шу сабабли унинг 19 август куни «Малага»га қарши учрашувда бир неча дақиқа бўлса ҳам майдонга тушиши ҳозирча қийин кўринмоқда.

«AS» маълумотига кўра, футболчининг атрофидаги манбалар унинг «Атлетико»ни тарк этиш истаги ҳали ҳам сақланаётганини билдирмоқда. Бироқ аргентиналик ҳужумчи бу масала бўйича ҳозирча клуб раҳбарияти билан очиқ суҳбат ўтказмаган. Бош мураббий Диего Симеоне эса жамоанинг Сеулдаги сафари ортидан икки кунлик дам олгани учун Алварес билан ҳали учрашмаган.

«Атлетико» раҳбарияти эса футболчи кетишни хоҳлаётгани ҳақидаги хабарларга эҳтиёткорлик билан муносабатда бўлмоқда. Клубда тарқатилаётган ҳар қандай янги маълумот муайян манфаатни кўзлаган ҳолда чиқарилаётган бўлиши мумкин, деб ҳисобланмоқда. Мадридликлар Алварес клуб ичида кетиш истагини расман билдирмаганини таъкидламоқда.

Шу билан бирга, «Атлетико»нинг позицияси ўзгармаган: клуб «Барселона» билан Альварес бўйича музокара олиб бормайди ва 100, 150 ёки ҳатто 200 млн евро миқдоридаги таклифларни ҳам муҳокама қилмайди. Мадридликлар футболчининг шартномасидаги 500 млн евролик товон пули бандига таянади.

Шу тариқа, ҳозирча трансфер бўйича келишувга яқинлашув йўқ. Алварес «Атлетико» билан машғулотларни бошлаган, клуб эса унинг шартнома шартларига риоя қилишини кутмоқда. Мадридликлар ва футболчи томони ўртасидаги зиддиятнинг кейинги босқичи эса Симеоне билан бўладиган суҳбатдан кейин янада ойдинлашиши мумкин.