Барча карталар стол устида. Трансфер дарчаси ёпилгунига қадар муайян эҳтиёткорликни сақлаш керак, албатта, аммо Моуринио ҳозирги таркибдан умуман норози эмас, фақат бир шарт билан. У Будапештдаги учрашувдан кейин буни очиқ айтди: «Мен қисқа таркибни хоҳлайман. 20 нафар футболчи ва ҳозирча жароҳатини даволаётганлар».
Хўш, ҳозир вазият қандай? Тиаго Питарч асосий жамоада қолиши маълум бўлганидан кейин Моуринио ихтиёрида 26 нафар футболчи бор. Улардан уч нафари — Милитао, Менди ва Родриго узоқ муддатга сафдан чиққан. Демак, мураббий истаган 20 кишилик таркибгача ҳали уч нафар футболчидан халос бўлиш керак, деб ёзмоқда AS.
Клуб мураббийнинг хоҳишларини қондириш учун трансферлар борасида сезиларли харажат қилди. Олти футболчи — Диоманде, Кукуреля, Дюмфрис, Конате, Бернарду Силва ва Карлос Эспига жами 225 млн сарфланди.
Родри трансферлар кампаниясининг асосий нуқтаси бўлиши керак эди. Аммо «Манчестер Сити» ярим ҳимоячиси клуб режаларини барбод қилди. Ҳозирча Мадрид клуби яна бир ярим ҳимоячини олиб келиш учун бозорга чиқиши кутилмаяпти.
Агар Асенсио учун яхши таклиф тушса ва академия тарбияланувчиси жамоани тарк этишга рози бўлса, клуб яна бир марказий ҳимоячи олиб келиши эҳтимоли бор. Аммо ҳозирча Асенсионинг ўзи қолишни исташини қайта-қайта таъкидламоқда.
Кўп вазифали футболчилар Моуринио учун муҳим
Моуриниога таркибда уч нафар футболчи ортиқча кўринаётганининг сабаби — у Гюлер ёки Бернарду Силва каби бир нечта позицияда ўйнай оладиган футболчилардан максимал даражада фойдаланишни режалаштирмоқда.
Уларнинг ҳар иккиси ҳужум чизиғининг деярли барча позицияларида, ҳатто ярим ҳимояда ҳам ҳаракат қила олади. Беллингем ҳам шунга яқин вазиятда. Дюмфрис эса Моуринио томонидан ҳатто марказий яримҳимоячи сифатида синаб кўрилди.
Жамоада ўйин амалиёти кам бўлган ва уни олиш истиқболи ҳам юқори бўлмаган футболчиларнинг кўплиги иш муҳитини бузиши мумкин. Мураббий эса айнан шундан қочмоқчи.
Камавинга бўйича таклиф йўқ
Клуб ҳали ҳам Камавинга трансферидан маблағ ишлаб олиш умидида. Аммо ёзги трансфер ойнаси бошланганидан бери француз футболчиси учун жиддий таклиф келиб тушмади.
Камавинганинг ўзи «Реал»да қолишни хоҳлаётганини билдирган. Бироқ унга юқори даражадаги клубдан таклиф тушса, унинг позицияси ўзгариши мумкин. Мадрид клуби бундай ҳолатда футболчининг кетишига тўсқинлик қилмасди.
Шунга қарамай, Моуринио мавсумолди йиғинларида Камавинга кўрсатган ўйин ва меҳнатсеварликдан ҳайратда қолган. Айниқса, унинг машғулотлардаги ишлаш қобилияти португалиялик мутахассисда яхши таассурот қолдирган.
Эндрикни ижарага бериш тўхтатилди
Эндрик билан боғлиқ вазият ҳам нозик эди. Аммо ушбу нашр хабар берганидек, Моуринионинг талаби билан клуб уни ижарага бериш режасини тўхтатди.
Шу сабабли энди асосий эътибор Мендига қаратилмоқда. Чап қанот ҳимоячиси позициясида уч нафар футболчи бор, Моуринио эса Мендининг жароҳатлар тарихини ҳисобга олган ҳолда ундан фойдаланиш имкониятига катта умид боғламаяпти.
«Реал» Менди масаласини ҳал қилишни истайди. Аммо футболчининг ўзи, AS нашри ҳам хабар берганидек, клубдан кетишни режалаштирмаяпти.
Асенсио ҳам сотилиши мумкин
«Реал» харид учун таклиф кутаётган яна бир футболчи — Асенсио.
Академия тарбияланувчиси Моуриниони ўзининг янги лойиҳасига мос футболчи эканига ишонтириши мумкинлигига қатъий ишонмоқда. У мавсумолди йиғинида бунинг учун жиддий ҳаракат бошлаганди.
Бироқ Асенсио соннинг тўғри мушагидан жароҳат олди. Бу уни Валдебебасдаги машғулотлардан тахминан олти ҳафтага четлатади. Табиийки, бу ҳолат унинг учун таклифлар келишини янада қийинлаштиради.
Моуринио таркибни қисқартирмоқчи
Моуринионинг режаси — ҳар бир позицияда икки нафардан футболчи бўлиши.
Таркибга оид схемага қаралса, ҳозир бир нечта позицияда ортиқча футболчилар бор. Марказий ҳимояда Милитао ҳали тикланмаганини ҳисобга олган ҳолда футболчилар сони кўп. Бразилияликнинг қайтиши ҳам катта саволлардан бири бўлиб турибди.
Чап қанот ҳимоясида ҳам ортиқча футболчи бор, гарчи Менди билан хайрлашиш эҳтимоли юқори бўлса-да. Ўнг марказий ярим ҳимояда ҳам вазият шундай: Бернарду Силва бир нечта позицияда, ҳатто таянч ярим ҳимоячи сифатида ҳам ўйнай олади.
Ҳужум марказида ҳам футболчилар сони Моуринио режасидан кўпроқ. Уларнинг бирортаси жамоани тарк этса, клуб бундан мамнун бўлади. Агар ҳеч ким кетмаса ҳам, бу фожиа эмас. Чунки асосий иш аллақачон бажарилган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади