Алварес «Атлетико» базaсига қайтган куни Симеоне Ибицага учиб кетди

Хулиан Алварес «Атлетико» раҳбариятининг «Барселона»га эҳтимолий трансфер масаласидаги хатти-ҳаракатларидан норози.

Mundo Deportivo хабар беришича, аргентиналик ҳужумчи 10 август куни клуб қароргоҳига қайтган ва вазиятни Диего Симеоне билан муҳокама қилмоқчи бўлган. Аммо бунинг имкони бўлмаган — жамоа бош мураббийи икки кунга Ибица оролига учиб кетган.

Футболчининг фикрича, Симеонеда муаммони ҳал қилиш ва у билан суҳбатлашиш учун «жасорат етишмаган». Алварес у қайтиб келган кунда мураббийнинг Ибицага учиб кетишини кутмаган.

Хулиан, шунингдек, «Атлетико» бош директори Мигел Анхел Хилдан ҳам норози. У ҳам иш жойида бўлмаган.

26 ёшли ҳужумчи машғулот базасида бўлган барча ходимларга ундан умид қилмасликларини айтган. У «Барселона»га ўтишни истамоқда ва ўз позициясида қатъий туришини маълум қилган.