“Барселона” Родри трансферини 48 соат ичида якунлашга ҳаракат қилмоқда. Испаниянинг Marca нашрининг ёзишича, каталонияликларнинг 30 ёшли ярим ҳимоячининг 2026/27 йилги мавсумда “блауграна” либосида тўп суришига ишончи комил, аммо “Манчестер Сити” билан музокаралар кутилганидан кўпроқ вақт оляпти.
“Барселона” ва Родри шахсий шартнома бўйича бир неча кун олдин келишиб бўлган. Энди асосий масала — икки клуб ўртасидаги трансфер суммасини келишиш. Каталонияликлар аввал “Сити”га 50 млн евро таклиф қилган, аммо инглиз клуби бу таклифни рад этган. Манчестерликлар футболчи учун тахминан 70 млн евро талаб қилмоқда.
Айни пайтда томонлар ўзаро талабларни яқинлаштириш устида ишламоқда. “Барселона” трансферни 60–65 млн евро атрофида, айрим бонуслар қўшилган ҳолда якунлашни режалаштирган. Манбага кўра, клублар ўртасида мулоқот яхши кечмоқда ва келишувга эришиш учун жиддий тўсиқ йўқ. Бироқ молиявий тафовут музокараларни секинлаштирмоқда.
Каталонияликлар келишувни айнан шу ҳафтада расмийлаштиришга ишонмоқда. Бироқ клуб раҳбарияти ҳозирча 48 соат ичида битимга эришишни кафолатлай олмаяпти. Бу эса Родрининг жума куни “Манчестер Сити” машғулотларига қўшилиб кетиши эҳтимолини юзага келтирмоқда.
“Манчестер Сити” бош мураббийи Энцо Мареска ҳам аввалроқ Родри жума куни Манчестерда бўлишини айтган эди. Испаниялик футболчи 2019 йилдан буён “Сити” шарафини ҳимоя қилиб келмоқда ва унинг амалдаги шартномаси тугашига яна бир йил бор.
Шу билан бирга, “Барселона”да Родрининг “Сити” машғулотларига бориши трансферни автоматик равишда барбод қилмайди, деган умид бор. Агар клублар ўртасидаги музокаралар яқин соатларда жиддий илгариласа, футболчи жамоа билан машғулотга қўшилмаслиги ҳам мумкин. Бунинг учун эса трансфер жараёни жадаллашиши керак.
Мухлислар бу янгиликни Telegram’да муҳокама қилмоқда
Изоҳлар Telegram’да очилади