Симеоне ва Алварес гаплашиб олишди

Хулиан Алварес «Барселона»га ўтиш истагини Диего Симеоне билан муҳокама қилди.

12 август куни аргентиналик ҳужумчи таътилдан қайтганидан сўнг илк бор бош мураббий қўл остида «Атлетико» билан машғулот ўтказди. Mundo Deportivo ёзишича, футболчи ва мураббий машғулот бошланишидан олдин суҳбатлашган.

Маълум қилинишича, Симеоне ва Алварес машғулотга жуда эрта келишган. Диего ҳали кўришмаган шогирдлари, жумладан Хулиан, Алекс Баэна ва Маркос Лорентени қарши олган.

Айнан шу пайтда Алварес ва мураббий ўртасида суҳбат бўлиб, футболчи вазият бўйича ўз фикрини билдирган. Симеоне эса унинг келажаги ҳақидаги қарорни клуб қабул қилишини, ўзи эса мураббий сифатида фақат спорт нуқтайи назаридан ёрдам бера олишини айтган.

Хулианга унинг вакиллари Фернандо Идалго ва Серхио Диас ҳамроҳлик қилган. Улар ҳужумчининг келажаги масаласини ҳал қилишга уриниш учун у билан бирга Мадридга келишган. Бироқ «Атлетико» ҳануз футболчини сотишга қатъиян қарши.