Суперлиганинг 17-турида «Қизилқум» яққол аутсайдер - «Машъал»ни қабул қилди. Ўйиндан аввал фаворит ҳисобланган навоийликлар амалда буни натижада ҳам, ўйинда ҳам акс эттиришган ҳолда 2:0 ҳисобида устунликка эришишди.
Муборакликлар эса яна мағлубиятга учради ва клубдаги руҳий тушкунлик ҳамон сақланиб қолмоқда. «Машъал» бош мураббийи Сергей Лушан учрашувдан кейин матбуот анжуманида иштирок этди.
- Ҳар доимгидек, изоҳларим йўқ. Рақиб жамоани муносиб ғалаба билан табриклайман. Ҳозирча қўшимча айтадиган гапим йўқ. Жамоадаги муаммоли вазият, афсуски, давом этмоқда. Айниқса, ҳимоядаги ўйинимизда бу яққол кўриниб турибди. Энди ёш футболчиларга таянишда давом этамиз.
- Сизнинг клуб билан шартномангиз қанча муддатга тузилган?
- Тўрт ойга, йил охиригача.
- Шунчаки, бундай шартнома тузилишининг маъносини тушунишга ҳаракат қиляпман. Ахир, бундай ҳолатда сиздан кейинчалик бирор нарсани талаб қилиш учун деярли ҳеч қандай мажбурият бўлмайди-ку?
- Нимани талаб қилиш мумкин? Жамоа ҳозир шундай ҳолатда. Жамоа 11-турдан буён охирги ўринда эди.
- Ҳа, биламан. Сиз келганингиздан кейин эса бироз жонланиш бўлди…
- Жонланиш, менимча, янги мураббий келган ҳар қандай жамоада бўлади. Жамоа ҳиссиётлар таъсирида дастлабки бир-иккита ўйинни яхши ўтказиши мумкин. Аммо янги нарса қуришни бошлаганингизда бундай ҳолатлар доим содир бўлади.
Бизда ҳимояда муаммо бор, жуда катта муаммо. Рақибнинг ҳар қандай ҳужуми - гол билан якунланяпти. Ҳозирча буни тушуниб бўлмаяпти. Энг ёмонига ишонгим келмайди, лекин биз ўтказиб юбораётган голларни ўзимиз ўзимизга «совға» қиляпмиз. Бу энди тенденцияга айланиб бормоқда.
Бундай вазиятда нима қилиш керак? Футболчиларни алмаштиришми? Мен бошқа вариантни кўрмаяпман. Шунинг учун таҳлил қиляпмиз, кўриб чиқяпмиз, ҳозир ёш футболчиларни танлаб, таркибга қўшяпмиз.
Нима фарқи бор — шу йигитлар билан олий лигада қололмаймизми ёки «дубль» билан тушиб кетамизми? Менимча, иккинчи вазифа — янги жамоани шакллантириш бўйича вазифа ҳам бор эди. Бизда рўйхат мавжуд. Кейинги мавсумда асосий таркибда кўпроқ ўйнатишни режалаштирган саккиз нафар футболчи бор.
Аслида бу жараённи бироз кейинроқ, вазият аниқ бўлгандан кейин бошлашни режалаштирган эдик. Лекин энди буни чўзишдан маъно кўрмаяпман. Шунинг учун, эҳтимол, кейинги турдан бошлаб таркибнинг 80 фоизи ўзгаради. Мана, ҳаммаси жуда оддий: бир таркибни олиб ташлайсиз ва бошқасини қўясиз.
- Одатда жамоа мағлуб бўлса, мураббийлар: «Айб менда», дейишади. Бундан футболчилар ҳеч нарса учун жавоб бермайди, деган хулоса чиқадими?
- Йўқ. Шундай ўйинлар бўладики, унда мураббийнинг ҳам айби бўлади. Масалан, футболчини алмаштирганда адашишингиз мумкин, кимнидир бироз эртароқ алмаштириб қўйишингиз ёки аксинча, кимгадир ўйнаш имкониятини бермаслигингиз мумкин. Бундай ҳолатлар бўлади. Бу ижодий жараён, ҳамма хато қилади. Ҳозир футболчиларни айблагим келмаяпти. Бугун майдонда бўлганларнинг кўпчилиги қўлидан келган барча ишни қилди. Шунчаки, тушуняпсизми, шундай тушунча бор: эмаклаш учун туғилган одам уча олмайди. Агар сен скрипка чалишни билсанг, космосга уча олмайсан. Оддий қилиб айтганда, ҳар бир инсоннинг қандайдир имконият чегараси бор.
- Жамоа «капитани»нинг…
- Мен жамоа сардорлари матбуот анжуманларида доимий равишда иштирок этишини жуда хоҳлардим. Чунки масаланинг икки томонини ҳам эшитиш керак: мураббий нуқтаи назарини ҳам, футболчилар томонини ҳам.
Тушуняпсизми, биз майдонда ўйнамаймиз. Баъзида ўйнагимиз келади, лекин бунинг иложи йўқ. Шунинг учун футболчининг, айниқса жамоа мағлуб бўлган пайтдаги фикрини эшитишни хоҳлайман. Шу маънода, бу нормал ҳолат. Ҳозир биз олтинчи турдамиз. Биз раҳбарият билан гаплашганмиз. Мен айтдим: «Қарорни ўзим қабул қиламан: таркибни ўзгартириш ёки...»
Бу гаплар ҳали шартнома имзоланаётган пайтдаёқ айтилган эди. «Менга олтита тур беринглар, шунда жамоамиз қандай эканини тушунамиз», дегандим.
- Шундай гаплашганмисиз?
- Ҳа, ҳа. Олтинчи турдан кейин маълум бир хулоса чиқарамиз, дегандим. Агар жамоа маҳорат даражасини ошира олса, футболчиларнинг савияси кўтарилса, демак, ишни давом эттирамиз. Агар ундай бўлмаса, унда таркибни бутунлай ўзгартирамиз. Мана, режамиз шу эди.
- Айтганча, яна бир савол. Ўтган йили одатда бош мураббийлар: «U21 жамоаси биздан кейин ўйнайди, шунинг учун яна бир кун қолиш имкони йўқ», деб айтишарди. Ҳозир эса улар сиздан олдин ўйнаяпти. Лекин нимагадир бош мураббийларнинг…
- Тушуняпсизми, ҳар бир тизимнинг ўзининг яхши ва ёмон томони бор. «Дубл» асосий таркибдан кейин ўйнагани, асосий жамоада ўйин амалиётига эга бўлмаган футболчиларнинг ёшлар таркибида қолиб, ўйнаши — бир томондан яхши. Лекин бошқа томони ҳам бор. Эътибор беринг: жамоа олти ойдан бери маош олмаган. Билмадим, энди... Ростини айтсам, биз тез орада нон учун ҳам ўзимиз пул тўлайдиган ҳолатга келиб қоламиз. Умуман пул йўқ. Ҳатто майдонлар ҳам суғорилмаяпти, чунки ишчилар ишлашни хоҳламаяпти.
Демоқчиманки, меҳмонхонада биз учун қўшимча бир кун қолиш харажатини тўлаш— оддий қилиб айтганда, фожиа. Шукрки, раҳбарият қандайдир маблағ топиб, ўйинга бир кун қолган ҳолда етиб боришимизга шароит яратиб беряпти. Аслида, эҳтимол, кейинги ўйиндан бошлаб ўйин кунининг ўзида йўлга чиқадиган бўламиз. Майли, тўққиз соатлик йўл бўлсин. Бу кимга керак? Балки кимгадир керакдир. Лекин бизда ҳатто ишни давом эттириш учун имконият қолмаяпти. Биз бунинг барчасини тушуняпмиз.
Мен айнан шу ўйин, футболчиларнинг эътирозлари ҳақида гапирмоқчиман. Яна бир бор айтаман: ўзим ҳам футбол ўйнаганман. 47 ёшимда ҳам футболдаман. Мен аниқ биламан: қандай вазият бўлишидан қатъи назар, футболга муҳаббат, Ватанга муҳаббат бор. Лекин уйингда болаларинг бўлса, уларни боқиш учун егулик топилмаса, уларнинг хаёли аниқ футболда бўлмайди.
Тушуняпсизми? Футболчиларнинг хотинлари, оилалари бор. Уларни боқиш керак. Бугунги кунда уларнинг қўлида ҳеч нарса бўлмаса, футбол ҳақида ўйлашга вақти йўқ. Шунинг учун улардан яна ниманидир талаб қилиш, «томдан баланд сакраш»ни кутиш адолатдан эмас. Улар икки тур давомидаёқ томдан баланд сакрашди. Мен шахсан уларга: «Менга бир-иккита ўйин беринглар, ҳаммасини ҳал қилиб бераман», деб ваъда бергандим. Менга ҳам худди шундай ваъдалар берилган эди. Лекин, афсуски, арава ҳали ҳам ўша жойида турибди. Мен раҳбарият билан гаплашганман. Бундай вазиятда бўлган клублар бизда жуда кўп. Нега бундай эканини билмайман. Жуда ачинарли, жуда.
Жаҳон чемпионатида иштирок этган миллий жамоа бор мамлакатда, аслида, футболда катта кўтарилиш, катта бум бўлиши керак эди. Лекин бу ерда шундай вазият», - дея бош мураббийнинг сўзларини келтиради Tribuna.uz мухбири.
