“Реал”нинг 590 млн евролик тўртлиги рақибларни чўчитмоқда

Жозе Моуринио ниҳоят “Реал” Мадриднинг тўлиқ таркиби билан ишлаш имкониятига эга бўлди. Энди португалиялик мураббий олдида жамоанинг энг катта қуролини — Килиан Мбаппе, Винисиус Жуниор, Ян Диоманде ва Жуд Беллингҳэмдан иборат ҳужумкор тўртликни бир тизимда самарали ишлатиш вазифаси турибди, деб ёзмоқда “AS”.

Мазкур квартетнинг умумий бозор қиймати Transfermarkt маълумотларига кўра, 590 млн еврони ташкил этади. Мбаппе 200 млн, Беллингҳэм 160 млн, Винисиус 140 млн ва Диоманде 90 млн евро деб баҳоланмоқда. “Реал” эса ушбу футболчилар учун жами 313 млн евро атрофида маблағ сарфлаган: Мбаппе учун трансфер пули тўланмаган, Диоманде 125 млн, Винисиус 45 млн, Беллингҳэм эса 103 млн еврога олинган.

Энг муҳими, тўртликнинг ўтган мавсумдаги статистикаси ҳам уларнинг салоҳиятини кўрсатиб турибди. Мбаппе 42 гол ва 7 та голли узатма, Винисиус 22 гол ва 14 та ассист, Диоманде 13 гол ва 10 та ассист, Беллингҳэм эса 8 гол ва 5 та голли узатма қайд этган. Шу тариқа, улар биргаликда 85 та гол ва 36 та ассистга ҳисса қўшган.

Моуринио ҳозирча асосий тактика сифатида 4-2-3-1 схемасини танламоқда. Унда Мбаппе марказий ҳужумчи сифатида ҳаракат қилади, Беллингҳэм унинг ортидаги “ўнлик” позициясида ўйнайди, Винисиус ва Диоманде эса қанотларни эгаллайди. Бу схема инглиз футболчисининг жарима майдонига яқинроқ ҳаракат қилиши ва гол уриш имкониятларини ошириши билан аҳамиятли.

“Реал”нинг мазкур тўртлиги ҳужумдаги рақамлари бўйича Европанинг энг кучли жамоалари билан ҳам рақобатлаша олади. Масалан, Мбаппе, Винисиус ва Диоманде учлиги ўтган мавсум 77 гол ва 31 та ассист қайд этган. “Бавария”нинг Кейн, Луис Диас ва Олисе триоси 109 гол ва 61 та ассист билан бу кўрсаткичда устун келган. “Барселона”нинг Ферран Торрес, Рафиня ва Ламин Ямалдан иборат учлиги эса 85 гол ва 33 та ассист қайд этган.

Энди Моуринионинг асосий вазифаси шу қадар кучли ҳужумкор футболчиларни бир вақтнинг ўзида майдонга тушириб, жамоа мувозанатини сақлаб қолишдан иборат.

Мадридликларнинг 16 август куни “Шалке”га қарши ўртоқлик учрашуви янги тизимни синаб кўриш учун сўнгги имконият бўлади. “Реал” 22 август куни Ла Лиганинг янги мавсумини “Эспаниол”га қарши бошлайди.